Ruihhlo tih rem dan ngaihtuah a tul hle – Lalrindika Ralte

Ruihhlo tih rem dan ngaihtuah
a tul hle – Lalrindika Ralte
Mizorama dan loa ruihhlo tawlh uluk taka zirchian a, a tih rem dan tur ngaihtuah a tul hle tih MLA Lalrindika Ralte chuan a sawi.
YMA Borai Branch din champha vawi 78-na, Inrinni zana Borai Zawlnuama neih a hmanpuinaah Hachhek bialtu MLA Lalrindika Ralte chuan, Pathianin mihringte nuam chên leh hlimna ûm ringawt tura a din kan ni lo tih hriatnawn fo a ngai tih sawiin, “Hlimna leh lungawina zawng nasa apiang he khawvelah hian an vakvai a. Rui lo hai loa hun hman hi a hlimawm ber a, a tha ber. Pathian pawhin chu chu a duh ber,” a ti a. Mizorama dan loa ruihhlo tawlh luh zawng zawng chu thuneituten uluk taka zirchiang a, a tih rêm dan ngaihtuah a tul hle tih a sawi a ni.
Ram leh hnam humhalh chu YMA kumpuan a nih angin, Mizoten kan hnam kan humhalh tur a ni, tiin, “He ram leh hnam tan hian kan rinawm tur a ni a, kan dik tur a ni,” a ti.
Kan nun tichhetu chu kan thiante emaw midang emaw ni loin, mihringin kan duhthlanna hmangin kan nun kan tichhia tih Lalrindika Ralte hian a sawi a. Ram leh hnam humhalh tur chuan mahni theuh in humhalh phawt a ngai a; mahni inhumhalh tih awmziaah chuan, mahni chhia leh tha hriatna fim tak hmanga nun hman a him ber tih a sawi.
YMA Borai Branch din champha lawmnaah hian naa intihsiakna chi hrang hrang lawmman sem a ni.