Ruihhlo zuar lui tlat kan pal dawn – R Lalngheta

Ruihhlo zuar lui tlat kan pal dawn
– R Lalngheta
YMA-in ruihhlo do a kalpuinaah ruihhlo zuar lui tlat ho chu an pal dawn tih Central YMA president thar tur R Lalngheta chuan a sawi.
Sakawrdaia YMA Inkhawmpui Lian vawi 75-na neih zawh taka thusawitu Central YMA president thar tur chuan, kan ram kan hnam a him loa, chumi chhanchhuak tur chuan YMA a pawimawh a, mi harsa leh mangang, hmeithai leh pachhiate tanpuitu atan YMA a ding a, hei hi eng tuinu mahin a pawlh buai tur a ni lo tih a sawi.
“Ram leh hnam tana YMA-in hna kan thawhna turah tute mahin kan ke pen an tibuai tur a ni loa, ruling an ni emaw opposition an ni emaw kan kalkawngah harsatna siam loa, lungrual taka thawhpui turin ka sawm a ni,” a ti.
Ruihhloin kan ram a tichhia a, a manganthlak hle tih R Lalngheta hian a sawi a. Aizawl khawpui leh district hrang hranga Home awm zawng zawngah thalai ruihhlo ngai an khat emaw ni tih mai tur a nih bakah home-a awm lo kawtlaiah hnawk khawpin an awm bawk tih a sawi. Hengte tanpuia chhuanchhuak turin ruihhlo do tlan a ngai a, lungrual a ngai tih a sawi a ni.
“Kan thalai a sang tel thlanmuala min umliam sak tawhtu leh a sang tel mi angloa min siamsaktu ruihhlo zuartute hi kan kawng dala an awm a nih pawhin kan pal dawn. Kan khawtlang nun him loa siamtute chu damdawi ruihtheih zuarte an ni a. Ruihhlo zuarte ka chah duh che u chu, a theih chin chinah sawrkar nen tangdunin YMA-in hma kan la anga, kan kawng dal lui tlat, zilhhau fo pawha ring ti khawng tlat chu tih tliah hmawk an ni ang,” a ti.