Ruihtheih thila sum vir dan

Mizoramah ruihtheih thila sum vir hi a sang hle nia chhut theih a ni a, a man theituten an man zat atanga chhutin, an man loha a lei duhten an leinaah sum kal ral tur hi a thahnem dawn hle nia ngaih a ni.
Ruihtheih thila sum vir dan
Mizoramah ruihtheih thila sum vir hi a sang hle nia chhut theih a ni a, a man theituten an man zat atanga chhutin, an man loha a lei duhten an leinaah sum kal ral tur hi a thahnem dawn hle nia ngaih a ni.
The Aizawl Post-in a chhutchiannaah ruihhlo, a bikin heroin a hluar a, a man theituten a man chin ringawt hi, man lohin heng ruihhlo ti thinte hnenah kal zel ni ta se, kumin thla 7 chhung hian Mizoram chhunga thehthang tur cheng vaibelchhe chuang hu man a ni tawha ngaih a ni.
Hetihlai hian zu pawh khapna dan hnuaiah man thin a ni a, kumin chhungin rakzu leh a senchi (IMFL) engemawzat man a ni tawh. January atanga July inkar khan Excise & Narcotics department chuan rakzu litre 53388.395 a man a, heng rakzu hi litre khat dawng plastic uma daha hralhchhuah thin niin, Aizawl rate ang chuan um khat hi Rs.100 anga chhut rual theih a ni. END-in kumin chhunga rakzu an man hi tualchhunga hralhna anga chuan Rs. 53,38,800 hu a tling tawh tihna a ni.
Thudawn danin Rangvamual leh Phunchawng atanga rakzu siam hi Aizawl bakah khaw hrang hrang, hmun hla deuh zawk thlengin hralhchhawn leh tura lakchhuah thin a ni a, an zawrh leh na khua azirin a rate hi a danglam hret hret nia sawi a ni.
Hralh theiha peih tawh rakzu an man bakah END hian kuminah zu bilh lai tin 117709 an man tawh bawk.
END hian January – July chhung vek hian a senchi (IMFL) um puitling 12157 an man tawh a. Thudawn danin a senchi hi Aizawla black market-ah um khat Rs. 1000 vela chawhrual theih nia sawi a ni. Chuti anga chhut chuan thla 7 chhunga END bik chauhin an man hi Rs. 12,157,000 hu a ni. Um puitling bakah hian a chanve um 1743 leh a quarter (180ml) um 1765 man tel a ni bawk.
Khap zinga tel beer pawh END hian tun thla 7 chhungin an man nual a, canned beer 500 ml bik chauh 25564 man tawhin, heng ho hi Aizawla black market rate ah pakhat Rs.250 nia sawi a ni a, suma chhutin Rs. 63,91,000 hu a ni. Beer hi a um chi (600 ml) 85 bakah canned beer 300 ml 316 an man tel a ni.
Thudawn danin a senchi leh beer an man tam zawk hi India ram hmun dang atanga lakluh, India rama siam a ni a. Hei lo hi, Myanmar lam atanga lak a senchi, beer leh ‘Burma zu’ tia sawi BEDC engemawzat man tur a awm reng a ni.
Kumin, thla 7 chhung hian END hian heroin kg. 52.854 leh methamphetamine kg 32.933 an man tawh bawk a ni.