Rul hming atan Leonardo Dicaprio hming chawi

Mizoram University-a Department of Zoology head ni mek Prof. H.T. Lalremsanga leh a PhD scholar Virender Kumar te chuan Mumbai, Germany leh United Kingdom tea an thawhpuite nen rul chi (species) thar an hmuchhuak a, a hmingah Titanic film-a a changtupa Leonardo Dicaprio hming chawiin Anguiculus dicaprioi an ti.
Anguiculus dicaprioi tia a hming an phuah hi Himalaya tlangram, Himachal Pradesh-a Chura Valley leh Shimla-tea hmuhchhuah a ni a, rul species thar a nih bakah genus thar a ni bawk.
He an zirchianna hi Nature publishing group scientific journal, Scientific Reports (2024) 14: 24743 chuan October ni 21, 2024 khan a tichhuak (publish) a ni.
Prof HT Lalremsanga chuan, “He kan rul hmuhchhuah hi a pianphung, DNA leh CT-scan hmanga a luruh zirchianna a\angin a laichin hnai ber Rhadinophis nen an danglam nasat em avangin species thar ni mai loin genus thar a ni tih finfiah a ni a. A hming Anguiculus dicaprioi hi Hollywood actor leh film producer ni bawk, environment humhalh leh global climate change dona lama thawhhlawk tak Leonardo Dicaprio hming chawiin kan phuah a. A common name-ah Dicaprio’s Himalayan snake tiin phuah a ni bawk a. He thil hmuhchhuah hian Eastern Himalayan Biodiversity Hotspot hi biodiversity lamah a hausakzia leh zirchian tur ala tamzia a ti langchiang zual a ni,” tiin a sawi.