Ruling MLA-in Sports minister mawng an hlim – K Sapdanga

Assembly House-a sports chungchang resolution putluhah ruling member-te leh opposition member ten Sports minister mawng an hlim ho tih ZPM working president K Sapdanga chuan a sawi.
Zirtawpnia an party office-a inkhawmah ZPM working president chuan Sports department fakna resolution putluh chu MNF sawrkar leh minister fak tumna ni angin lang mah se, Sports minister tihmualpho tumna nia a lan thu a sawi. “Sawihona ngaihthlak khan ruling party-ten thiam takin resolution hi an pulut niin a hriat theih. He department hian sum a hmang hnem a, minister hian a remhriatna bakah zawl pachal tak a nei niin a rinawm. An sum hmanna chu utilisation certificate thehluh tur an nei si lo a, project thar an thehluh pawh sawrkar laipuiin an hnathawh hmasate chingfel phawt tura tiin a lo dang a ni. Hei hi mipuiin an hre loa, mipui hriata sawichhuahna remchang a awm theih beiseiin, ruling party ten resolution an pulut a, opposition-te nen Sports minister mawng an hlim ho ta a ni,” a ti.
PMJVK atanga sports-in sum thahnem tak a dawn chu a endiktu PMJVK Empowered Committee, nikum March 14-a meeting minute-a a lan dan chuan, sum dawn tawh hman loh vbch. 194 a la awm a, sum hman tawh UC pek theih loh vbch. 107 a awm; hei vang hian 2022- 2023 atan Mizoram project hnawlsak kan ni ta tih a sawi.
“Heng hi RTI hmanga chhuichian a ni a, a thawktute hi firm hrang hrang an ni. Tute nge an nih kan hre vek a, financial year tawp dawn ruaiah hna an la thawk zo lo nasa em em a, an thawh muan chhan kan chhui mek. Heng firm phenah hian Sports minister rim kan hria a ni,” K Sapdanga hian a ti.
Sawrkar kal mek chu sumin a tibuai a, mipuiin hun pek an tum tawh lo tih ZPM working president hian a sawi. Tun sawrkar laka mipui beiseina sang ber chu, an chawlh hun a ni ta ber tih a sawi a ni.
Thawhhona sawrkar din tumnaah ZPM tel ve anga sawi chu thu diklo a ni tih ZPM hruaitu hian sawiin, “Party dang nena thawhho chungchang kan la rel lo, a mala min sawrkar tir tumtu mipui beiseina tihhlawhtlin tumin a mala sawrkar siam kam tum,” a ti.