Rullam kum 50 tlin lawm

Rullam kum 50 tlin lawm
Rullam khaw luah leh kum-50 na chu Nilaini khan haw runpui neiin hman a ni a. He hun hmanpuitu minister Er Lalrinawma chuan Zoram buai laia ram leh hnam tana martar, Rullam amite hriatrengna lungphun a hawng nghal.
Minister chuan haw khawm runpui leh khaw luahleh kum 50-na hmang theia Rullam khuain malsawmna a dawng chu lawmawm a tih thu a sawi a. An khawmi ram tana martarte hriatrengna lung phun nachang an hria chu ropui a tih thu a sawi.
“He hun hlu takah hian khawtlangah inremna leh lungrualna lo par vul zual se, malsawmna tam tak khawtlangin dawng zel thei se ka duh a ni,” a ti.
Martarte puala lung an phun chu ropui a tih thu Er Lalrinawma hian sawiin, “Kan ram leh hnam a boral loh na’n hnamah kan thanharh a ngai a, kan hnam tana martarte thisen luanna rama chengte hian kan pasalthate chawimawi nachang kan hriat a tul hle,” a ti. Ram leh hnam tana an duh leh beisei an hlenchhuah hman tak lohte hrerengin, kan hmaa awmte rinawm taka kan thawh zel a tul tih a sawi a ni.
Ram leh hnam tana martar mi 7-te hriatrengna lungphun hi Rullam khawtlang buatsaih niin, khawtlang huapin Vuttaia Runah hun hman a ni.