Rultuha vâng tak hmuchhuak

Mizoram University Department of Zoology-a Prof. HT Lalremsanga leh a research scholar-te chuan Mizoram hmun hrang hranga rul an zirchiannaah India rama rultuha, record-a la awm ngailo, ‘Trimeresurus uetzi’ a awm ve tih an hmuchhuak. An zirchianna hi Indian Biodiversity scientific journal lian ber, Journal of Threatened Taxa volume 16 issue no.5 chuan kumin May 26 khan a tichhuak.
Trimeresurus uetzi hi rultuha chikhat, vâng tak a ni a. Kum 2023 khan German, Vietnamese leh French scientist tangrualten Myanmar ram chhung – Mandalay, Sagaing, Magway, Bago, Chin & Shan states atangin species thar a ni tih an hmuchhuak. An lan danah chuan, rultuha pangngai (Trimeresurus erythrurus) nen a inang leh hriathran har tak, cryptic species an ni a; an DNA leh phuhlip zirchian chuan danglamna an lo nei teuh a ni.
Myanmar ram chauha awm (endemic species to Myanmar) emaw tih laiin, Mizoramah an lo awm ve reng tih hmuh a ni ve leh ta a, heti hian tunah India ram chhunga rultuha (Trimeresurus) species chi hrang hrang record awmsa 20 ni thin chu 21 a ni dawn a ni.
Mizoram bikah chuan kum 2022-a Champhai atanga hmuhchhuah tawh ‘Trimeresurus mayaae’ tiamin rultuha species pali record neih a ni ta a, hei hian Zoram leh a chhehvel hi ‘continental drift’ avanga Indian subcontinental leh Southeast Asia insuihfinna lai a nih avangin nungcha tinreng (biodiversity) ah a hausak zia a tichiang hle tih sawi a ni.ASF hrileng hi nikum lama leng tawh kha a ni a, nikum kum laihawl vela mi kha a la reh lo. Kumin hian April vel atang khan a hluar nia ngaih a ni.