Siaha damdawi ina doctor awm loh chhan chhuizui

District Hospital Siaha-a doctor awm loh avanga damlo inentir pakhat an hawpui leh nia sawi chungchang chu Health minister hriattir angin department hotuten an chhui zui a, an thukhawm zui a ni.
May 26 (Pathianni) zing dar 6.00 vel khan Lenchii (90), Siahatla-III ami chu chetsualna avangin District Hospital Siaha emergency panpui a ni a, chawhnu dar 2.00 thlengin doctor entu an awm loh avangin a chhungte lungawi lo chuan casualty atangin an inlamah an let pui tih sawi a ni.
He thil thleng hi Siaha bialtu MLA Dr K Beichhua pawhin pawi a tih thu sawiin, medical negligence nia a lan avangin hma la turin Health minister hnenah a thlen a ni.
He thu hriat a nih veleh Health & Family Welfare minister Lalrinpuii chuan Health department hotute chu thil awmdan chhuichiang turin a hrilh nghal a. Thuchiang an hriat hnu, Thawhtanni chawhnu khan minister hian department hotute a thutkhawm pui.
He thil thleng hi pawi a tih thu minister hian a sawi a. Tun hnuah hetiang thil hi thleng leh tawh lo turin a hriattir a ni.