Russia-in missile-a Kyiv an beihnaah mi pariat thi

Russian-ten Nilaini zan zankhuaa missile hmanga Kyiv leh a chhehvel a beihnaah mi pariat vel an thi tih Ukrainian thuneituten an sawi.
Apartment block, kudam, naupang damdawi leh sikul te pawh ‘nasa taka beih’ a ni tih Ningani khan State Emergency Service of Ukraine (DSNS) chuan a sawi a. Mi 33 vel hliam tuar an awm.
Thuneitute chuan in chim kara tangte chhanchhuah hna an thawk zui mek a, damin mi pahnih an la chhuak tawh.
Kyiv Mayor Vitaly Klitschko-a chuan naupang damdawi in beihnaah hian a tukverhte a chhia a, a bula car dingte pawh a kang niin a sawi a. Sikul chhia a awm bawk tih a sawi.
Kyiv chhimthlang lam, Solomyanskyi district-a industry hmun pawh missile-in a fuh tih mayor hian a sawi.
Kyiv region Governor Tymur Tkachenko-a chuan Brovary district-ah mi pakhat thiin pakhat dangin hliam a tuar tih a sawi a. Beihna a thlen hma hian mipuite chu shelter-a tlan lut turin an ti tih a sawi.
Ukrainian air force-ten khawpui panin missile a thlawk mek tih an sawi avangin zankhuain missile alert tihchhuah a ni.
Russian-ten an beihna avang hian mi tam takin zankhuain power an nei lo va, Kyiv region tam tak thimin energy grid chhiate siam hna thawh zui mek a ni.
Russian defence ministry chuan Kyiv-a drone leh ralthuam dahna hmunte an bitum niin an sawi.
Kyiv hi tun hnaiah zan tin deuhthaw beih a ni a, thenkhat phei chuan thihna tam tak a thlen.
Chawhkar khat liam ta chhung khan Russia-ten attack drone 1,550, guide aerial bomb 1,560 leh missile 62 hmangin an bei niin Ukrainian President Volodymyr Zelensky-a chuan a sawi.
Ukraine pawhin Russia ram ril zawk bei ve zelin tun hnaiah drone 600 vel hmangin Moscow a kap.
Ram pahnihte hian civil mite beiah an inpuh tawn reng bawk.