Sumdawnna thilah India leh EU indawr chhunzawm leh dawn

Sumdawnna thilah India leh EU indawr chhunzawm leh dawn
India leh ram 27 telna, European Union (EU) hotu lawkte chu Thawhtanni atang hian free trade agreement siam an tum chungchangah Brussels-ah an inbe leh dawn a, a hmaa an duh dan inan lohnate siam rema inremna a awm theih dan tur an dap dawn tih Indian thuneituin a sawi.
Tun hi a vawi 14 nana an inbiakna a ni a, Thawhtanni atanga tanin ni nga chhung an inbe dawn a ni.
Commerce & Industry Minister Piyush Goyal-a chuan tun hnai khan inremna a awm theih thuai a beiseiawm tih a lo sawi tawh a. Lehlam lehlam hian sumdawnna leh investment-ah an hlawkpui ve ve theih tur inremna neih an tum a ni.
Goyal-a chuan tun thla tawp hian EU Trade Commissioner Maros Sefcovic-a chu South Africa-ah a hmuh rin a ni a, hetah hian inbiakna an thil sawite sawi dunin December-ah inremna tak tak ziah theih beisei a ni.
Sefcovic leh European Commission-a Agriculture Commissioner Christophe Hansen te chuan thla hmasa khan Goyal-a ho hian indawrna kal mek an lo sawiho tawh bawk a. December-ah tihhlawhtlin ngei an duh theuh a
June, 2022 atang khan India leh EU hian kum riat chhung an lo bawhzui tawh loh, FTA siam tura inbiakna hi an chhunzawm leh tan a. Kum 2013 khan a hmasaah indawr tanin a hnuah inmil theih lohna tam tak an neih avangin an indawr zui ta lo a ni.
Lehlam lehlam hian lirthei leh damdawi hmanruaah chhiah inlaksak thin tihtlem ve ve an phut a. EU hian uaiin, spirit, sa, sava leh ar lam chi leh finna lam kaihhnawih thila chhiah tlem zawk laksak an phut bawk.
Inremna hi siam theih a nih chuan EU-a Indian bungrua thawh chhuah eng emaw zat – ready-made garment, damdawi, steel, petroleum product leh electric hmang khawlte chu man tlawm deuh zawka hralh theih a ni dawn a ni.
India-EU insumdawn tawnna tura rawtna hian policy area/chapter 23 a nei a, heng zingah hian bungruaa insumdawn tawnna, service, investment, hnawm thenna, technology thil, sumdawnnaa mahni invenna, rei daih thei tur hmasawnna siam leh thil dang tam tak a tel a ni.
India leh EU inkara insumdawn tawnna hi kum 2024-25 chhung khan US $ tluklehdingawn 136.53 a tling a. Heng zinga India-in a thawn chhuah thil man hi US $ tluklehdingawn 75.85 niin US $ tluklehdingawn 60.68 man a la lut bawk a. Bungruaa a sumdawnpui lian ber an ni.
India-in thil a thawn chhuah zawng zawng zinga 17% chu EU-a hralh chhuah niin an thil thawn chhuah zinga 9% chu India-in a leisak a ni ve thung.