Ukraine defence minister kal chhuak tur chuan an ram chuan tun thla tawp lamah Russia chetlakna nasa tak tur an hmachhawn dawn tiin a sawi.
-- Advertisement --
News conference a neihnaah Oleksiy Reznikov chuan Khawthlang ram ralthuam ten Ukraine an thleng hman dawn lo nachungin Ukraine chuan Russian forces te dang turin theihna a nei tiin a sawi.
President Volodymyr Zelensky chuan khawchhak lama Bakhmut, Vuhledar leh Lyman ah te inbeihna nasa takin a thleng mek a ti bawk a.
Reznikov hi defence minister atanga thlak tur a ni thung a. Military intelligence chief Kyrylo Budanov chuan a ai a awh dawn niin sawi a ni.
Hetiang minister te siksawi a nihna chhan hi defence ministry-ah eirukna nasa tak awma pholan chhoha a awm vang a ni a.
Reznikov chuan media report hrang hranga defence official thenkhat ten public funds te army te ei tur lei nana dah te chu an chheprelh tia an sawina chu a pha thung a.
Ukrainian lawmaker David Arakhamia chaun indona chuan personnel policy a thlak danglam thin tia sawiin Reznikov hi Ukraine in Western weapons a neih theih nana langsar tak niin tunah erawh strategic industries lam a chang tawh dawn thung.
Reznikov chuan Russia chuan Ukraine bei turin a theihna zawng zawng a hmang dawn lo nia sawi a ni a, mahse 24 February-a Ukraine a run champha a thlen dawn tawh avangin chet nat hle an tum nia ngaih a ni thung.
Ukraine defence minister chuan sipaite chuan German siam Leopard tank enkawl dan an zir nghal tur thu a sawi bawk a. Reznikov chuan Ukraine chuan long-range missile 150 km kap pha an neih thu sawi bawkin mahse Russian territory kah nana hmang lovin, Ukraine a Russian units te kah nan an hman tur thu a sawi bawk a.
“He indonaah hian kan chak zawk dawn tih ka hria a ni,” tia sawiin Reznikov chuan Western fighter jet te tel lo erawh chuan ‘nunna tam zawk chan a ni ang’ tiin a sawi thung.
Ukraine hnenah Khawthlang ram ten ralthuam an pe lut chungin Russia chuan tun hnaiah Bakhmut area leh a chhehvelah hma a sawn zawk a, Russia chuan sipai tam zawk a tirh luh belh zel a.
Russia paramilitary mercenary group Wagner te chu indonaah a hmatawng leh sulsutu an ni zel a. Wagner hotu lawk ber Yevgeny Prigozhin chuan khawpui thenkhatah chuan kawtthlerah indona nasa tak kalpui mek a ni a ti bawk.
Russian forces te hian thla tam tak chhung chu Bakhmut hi thunun tumin an bei tawh a, Ukraine an run hnua indona an kalpui bik hun awh rei ber a ni tawh bawk. He hmun hi a Russia tana pawimawh em em niin Donbas region pum a thunun theihna tur a ni bawk.
Ukraine President Zelensky chuan, “Donetsk region-ah thil a har hle mai a, indona turu tak a thleng mek a. Mahni nvena chak tuma beih mai bak tih theih kan nei lo,” tiin a sawi.
Hetih lai hian UK Minsitry of Defence chuan Bakhmut a Ukrainian forces te chu rauhsana awm mekin Russian sipaite chuan hmasawn zelin khawpui hual an tum mek tiin a sawi.