Lirnghing turu takin south-eastern Turkey nuaiin mi 1000 chuangin nunna an chan a, mi tam tak in chimin a chhilh an la awm mek bawk.
US Geological Survey chuan lirnghing hi 7.8 magnitude laia na a nih thu sawiin Gaziantep khawpui bul lawk chu a intanna niin lei hnuai 17.9km vela thukah a nghing tan a ni.
-- Advertisement --
Turkish Vice-President Fuat Oktay chuan lirnghing avanga nunna chan mi 284 chuang an awm tawh thu a sawi a. Lirnghing hian khawpui lian 10 nuaiin chung zingah chuan Diyarbakir pawh a tel a.
Syria-ah chuan lirnghing vang hian mi 230-in nunna an chan tawh tiin state media te chuan an tarlang a.
Nunna chan hi an pung zel tura ngaih niin building tam tak a chim a, a chim hnan mi engzah nge awm tih hriat theih mai a ni lo va, chhanchhuah hna kalpui mek a ni.
Turkish Interior Minister Suleymon Soylu chuan khawpui 10 lirnghingin a nuai nat thu sawiin chungte chu – Gaziantep, Kahramanmaras, Hatay, Osmaniye, Adiyaman, Malatya, Sanliurfa, Adana, Diyarbakir leh Kilis te an nih thu a sawi a.
Malatya province, north-east of Gaziantep ah mi 23-in nunna an chan bawk a. Sanliurfa khuaah mi 17-in nunna chan bawkin Diyarbakir leh Osmaniye-ah pawh nunna chan an tam hle bawk.
Lirnghing hi Lebanon leh Cyprus-ah te pawh hriat a ni a. “Thil eng emaw ka ziah lai a ni a, thawklehkhatah building a nghing thut a ni,” tiin Mohamad El Chamaa, zirlai Leabanese capital Beirut a awm mek chuan a sawi a.
“Tukverh bula ka awm lai a ni a, a chim ang tih hlauin ka hlauthawng hle a ni. Minute 4 atanga minute 5 vel lai niin ka hriaa a rapthlak takzet a ni,” tiin a sawi bawk.
Gaza Strip a cheng Rushdi Abualouf chuan second 45 vel lai lirnghing in an chenna chu a nuaia a hriat thu a sawi thung.
Turkish seismologists te chuan lirnghing nat lam hi 7.4 magnitude niin an ngai a, a nghin hnu minute hnih lekah a nghin nawn leh thu an sawi bawk.
Turkey hi khawvela lirnghing thlen duhna ber ram zinga tel a ni a. Kum 1999 khan lirnghing na tak vangin mi 17,000 chuangin nunna an chan phah tawh bawk.
Tun lirnghing avanga nunna chan hi an la pung zel tura ngaih niin chhanchhuah hna theihtawpa thawh mek a ni a. Chenna In tam tak tlu chhe rem rumin tun dinhmunah chuan mihring engzah nge a delh a, a tihchhiat dan pawh hriatfiah mai hleitheihin a la awm lo a ni.