RV leh Phunchawnga puih ngaite puih dan tur rel
RV leh Phunchawnga puih
ngaite puih dan tur rel
Core Committee: Mission Chhanchhuahna (Phunchawng leh Rangvamual te tana eizawnna tluantling ngaihtuahna Committee) chu Nilaini khan Rangvamualah an chairman, Aizawl bawrhsap Dr Lalhriatzuali Ralte kaihhruaiin an thukhawm.
Mission Chhanchhuahna hi Rangvamual leh Phunchawng veng pahniha eizawnna mumal neilo, zu zuar leh danin a phal loh hmanga eizawngte chhanchhuahna tur project niin, senior social scientist Debashish Mukherjee leh a team-te chuan an lo zirchiang tawh a; hemi atang hian sawrkar department hrang hrangin an scheme, loan leh service dang dangte eizawnna atana an hman theihna tur siamna’n tanho a tul tih avangin Core Committee leh Working Committee din a ni.
He Mission-in a tum ber chu zu leh ruihhlo hmanga an eizawnna an bansan a, eizawnna ngelnghet zawk leh mi chengte pawh ram tana mi hmantlak zawk leh khua leh tui tha zawk an lo nih theihna’na hma lakpui leh dawmkanna tur kawng dappui a ni tih chairman hian a sawi.
Core committee enpuina in Rangvamual leh Phunchawng Local Vouncil te remruat angin Gram Sabha buatsaih nise, department-ten remchang ni hmasa berah ‘help desk’ siamin sawrkar scheme hrang hrang leh training, loan eizawnna atana an hman theih mipui hnena hrilhhriat bakah tanpui theihna’na kawng hawnna hun siam nise tih a ni.
Thutkhawmah hian Rangvamual leh Phunchawng Local Council, YMA leh kohhran hruaituten an vengchhung harsatna chi hrang hrang – hriselna lam, zirna lama an tlakhniam chhan, infiamna leh community hall an neih that loh thu, drainage tha an mamawh thu leh an harsatna dangte thlenin, engtianga kalpui zel tur nge ngaihtuah ho a ni. Department official-ten an department-in hma an lakna, schemes, loan, training an pek theih te an sawi a ni.
Mission Chhamchhuahna atan hian Planning & Programme Implementation chuan SEDP hnuaiah sum a tumsak a ni.
Committee-ah hian co-chairman chu Aizawl SP a ni a, District Legal Services Authority, Aizawl Municipal Corporation, Mizoram Social Defence & Rehabilitation Board, UD&PA, LESDE, Health & Family Welfare, lead bank leh Mizoram Rural Bank bakah department dangte an tel a ni.