SA-in ‘Thawhlawm Ni’ hmang

Salvation Army India Eastern Territory chuan Pathianni khan Self Denial Altar Service – mahni inphat thawhlawm lakkhawm Ni an hmang a. India Eastern Territory-a Corps leh Society hrang hrangah an lakhawm. Mahni inphat thawhlawm lakkhawm hi Thianghlimna Inkhawmah Corps hrang hrang leh Society chuan buatsaihin, inkhawm banah thawhlawm lutte chhiar nghalin Pathianni zan khan CCorps tinin an hmuh zat an puang a ni. Mahni inphat thawhlawm hi khawvel ram hrang hranga Salvation Army-ten anmahni remchan hunah lakkhawm hun an siam thin a, thawhlawm hi Corps atangin Territorial Headquarters (THQ) a chhunluh a ni. THQ-a a luhkim hnuah THQ hian International Headquarters, Londonah zaa 42.5 a chhunglut a, hei hi khawvel ram hrang hrangah a tul angin kumtin leilung chhiatna thleng, indona vanga tuar, raltlan leh tul dang apiangah an hmang thin. THQ-in zaa 42 a chan hi Home hrang hrangah semdarh thin a ni a. Zaa 10 hi Relief Fund-a dahin, Emergency Relief atan leh tanpui ngai a tul ang angah hman thin a ni. Zaa 5 hi Division-ah rikrum thila chhawmdawlna atan pek a ni bawk.