Sa talhna hmunpui

Nimina Mualpuia Modern Slauhter House tlawhtu Larsap Indra Sena Reddy Nallu chuan, ran talh tur a hrisel em tih talh hma leh hnua enfiah zel a pawimawh tiin a sawi a; ran talhna hmun ni lova talh a awm loh nana hmalak a tul thu sawiin, Modern Slauhter House chu a nihna ang taka mumal zawka kalpui a nih theih nana tan la turin thawktute a chah nghal a.
Tunhma khan Bung Bangla thlang lawkah Mizoram slaughter house hmasa ber kha din a ni a, mahse a panna a hlat tham deuh avangin ran talhtuten an pan tha hlei thei lo a, sawrkar lamin transportation subsidy kha a tirah a ruahman thei mai lo bawk nen, zawi zawiin a thamral ta a ni ber a. A hnuah privatised a ni ta awm e.
Chumi hnuah tuna Mualpui ami hi din a ni leh a, bawng talh theiha siam a ni a, mahse vawk talh theihna tura ruahmanna erawh kalpui theih a ni ta lo a. Thawkkhat lai kha chu, hmanrua te pawh a tuiek bir ber hman a, mahse tan lak thar a ni a, tun thleng hian bawng chu talh a ni ta a.
Nimina Larsapin a hmunhma ngeia a tlawh hian, thil kalphung chu a hmu chiang hle ang a, a nihna ang tura kalpui a ni lo tih a hria a, chuvangin ‘a nihna ang taka mumal zawka kalpui a nih theih nana tan la turin thawktute a chah’ ta nghe nghe a ni.
A nihna takah chuan, Aizawl khawpui, mihring nuai thum chuang awmnaah hian, tuna modern slaughter house ang hi Aizawl chhim leh hmar chhak leh thlangah awm thliah thluah tur a ni awm e. Mualpui ami chauh hi chuan min chawm zo lo tih a lang chiang a. Veng hrang hranga ran talh a nih dan kan hriain kan hmu reng a, heng zingah hian sa thianghlim tawk lo lo zuar lawp lawp duh an awm lovang tih pawh sawi theih a ni lo.
Mipuiin sa thianghlim an ei theihna tura hma latu tur a kaihhnawih department lam hian eng angin nge hma an lak tih hi chipchiarin mipui lam chuan hre rih lo mah ila, hetiang khawpui ve riang ruangah hi chuan, slaughter house tam zawk kan mamawh tih hrechiang hlei hlei tur an ni a, sawrkar pawh hian ngaih pawimawh hmasakah nei thei se a duhawm hle a ni.