Sabalenka bialpa Koltsov a thi

Hmeichhe tennis world number two ni mek Aryna Sabalenka bialpa Konstantin Koltsov chu kum 42 mi lek niin a thi tih Russian ice hockey club Salavat Yulaev chuan Thawhlehni khan thuchhuah siamin an tarlang.
People magazine ziah danin kum 2021 June thla atang khan Belarusian Sabalenka leh a chipui pro ice hockey player hlui Koltsov hi an inkawp tan a; khami hnu khan Sabalenka hian vawi duai lo an pahnih thlalak chu a Instagram account lamah a phochhuak tawh a ni.
Forward Koltsov hi kum 2002 leh 2010 Olympic-ah khan Belarus national team tan a khel a; kum 2002 leh 2006 chhung khan National Hockey League team Pittsburgh Penguins tan season thum a inelna a hmachhawn bawk.
Vur chunga a speed tha lutuk hmingthanpuitu Koltsov hian kum 2008 khan Salavat Yulaev chu Russian Super League title a lakpui a, tunhnai khan a club hlui lamah hian assistant coach ni turin a kir nghe nghe.
A bialnu hi tennis khelmualah a tawiawm fo a, kumin January thlaa Australian Open title a humhim lai khan Koltsov hian mipui zing atangin Sabalenka a lawmpui a, TV camera lamin an tarlang chuai chuai a ni.
Karliamta mai khan Sabalenka hi Indian Wells last 16 paltlang zo loin a tla a, Miami Open lamah insawnin, ruahman lawk ang chuan Zirtawpni hian a match hmasaber a khel dawn a, hetia a bialpa a chan takah chuan US tournament-ah hian a inlan zui dawn em hriat a ni rih lo.