Sachin Pilot-an a telna sorkar a kar ngat

Congress leader Sachin Pilot chuan a telna ngei sorkar laka lungawilohna lantirin nikhat chaw nghei a kalpui a. A tihtur hre lawkin party senior tena ti lo tura an ngenna pawh a hnawl a ni.
Sachin Pilot hian a telna ngei sorkar chhunga eirukna nasa duhlohna lantirin Chief Minsiter Ashok Gehlot chu BJP CM hlui Vasundhara Raje puhna laka chet la duh lovah a puh a.
Gehlot sorkar chuan Pilot puhna chu hnawlin Assembly Election hun rei lo te maia neih turah Congress party tan zahthlak tak nia ngaih a ni bawk a.
“Sachin Gehlot-an Thawhlehni a chaw nghei a kalpui hi party kalha chetna niin anti-party activity a ni. A telna ngei sorkar-ah thil fel lo a awm a nih chuan media leh public ah ni lovin party forum-ah a sawi tur a ni,” tiin Congress Rajasthan in-charge Sukhjinder Singh Randhawa chuan a sawi a.
“Tun hnai kum nga chhungin AICC in-charge ka ni tawh a, Pilot hian engmah sawipui min la nei lo. Amah nena inbiak pawhna kan nei reng a, inbiakna tha tak neiin kan kal theih ka ring a, Congress party tana ro hlu tak a ni si a,” tiin Randhawa chuan a sawi.
Pilot hian eirukna chungchangah lungawilohna a lantir chungin Gehlot sorkar mekah Congress leadership te a nawrna nia ngaih niin kumina Rajasthan inthlan awm turah party kaihruaitu tur zawk tichiang tura a turna anga ngaih a ni.