Taiwan awp duhin China inluling zui zel

China chuan Taiwan leh a chhehvelah military drills (sipai nunchan) a nei a. Mahse, mithiamte chuan nasa uchuak lo leh awmze nei thuk zawkin a kalpui an ti a. Taiwan hian thla kua hnu lekah president thlanna a nei dawn a, chutah chuan China chuan opposition Kuomintang party (KMT) te chu chak ngei se a duh vang an ti,
Taiwan hnaiah missile kahchhuah a ni lo va, sipai nunchan zirin ni thum chauh a awh bawk a. Chu mai bakah Taiwan President Tsai Ing-wen in US House Speaker Kevin McCarthy a hmuh avangin hrekna emaw engmah puan leh sawi a awmphah miah lo bawk.
Nikum August thlaa khatih laia US House speaker Nancy Pelosi in Taiwan a tlawh tuma China chhanletna kha a na fe zawk bawk.
Sipai nunchan zir hi China in Pelosi in Taiwan a tlawh hnua ‘standard operation procedure’ a neih zingah a tel tawh tiin Professor Chen-shen Yen, Taiwan National Chengchi University chuan a sawi a. “An dinna chiang taka an tarlan a ngai a, chutihrual chuan uchuak taka an chet a rem hauh lo,” tiin a sawi a. An chet hun chu pawimawh ber a ni zawk a ti bawk.
Chinese Communist Party te chuan KMT te hi China civil war kum 1949 a tawpah khan an hneh a, KMT te hi Taiwan-ah an tlanchhia a ni. Mahse, tun hnaiah thu pawm tlan nei theiin 1992 consensus siamah thu chiang lo ruaiin ‘One China’ chauh a awm tih pawm a ni a, chutah chuan Taiwan pawh rin luh tel a ni.
Beijing hian nasa zawka chet a la a nih chuan independence awn Democratic Progressive Party (DPP) te tana campaigner tha ber a ni daih dawn, tiin prof Yen chuan a sawi a.
Nikum khan KMT te chuan local election ah chakna nasa tak an chang a, mahse, analysts te chuan president thlannaah erawh China factor chuan a buk rit em em thung an ti.
China hian Taiwan lakah ‘carrot-and-stick’ policy a kalpui, tiin Professor Fang-yu Chen, Taiwan a Soochow University chuan a sawi a. Kawng khatah China chuan economic leh cultural exchange te chu Taiwan in “One China” principle a pawm chuan a tiam a, kawng lehlamah sipai chakna nasa zawkin a thuam tha zel thung.
“Beijing chuan Taiwan mipuite hnenah DPP te an vote tling a nih chuan indona a awm ang a, KMT te an vote erawh chuan inremna a awm ang tih a hrilh a ni ber,” tiin a sawi.
China-in military exercise a kalpui avanga US leh Taiwanese politician te an tim a nih chuan a hlawhtling khat tihna a ni bawk a. Taiwan chuan Tsai-McCarthy in hmuhna kaihhnawihah pawh boruak sosang awm loh nan hma a la reng a ni.
Nikum July thla khan McCarthy chuan house speaker a nih chuan congressional delegation kaihhruai a duh tur thu a sawi a. Tsai administration chuan McCarthy chu Taiwan security hisapin US ah inhmuhpui a thlang zawk tiin, Financial Times chuan a tarlang.
US pawhin ram pahnih hruaitu lawkte inbiakna neih chu a zal zawnga sawiin US leh Taiwan te chuan Tsai in US a lut chu ‘tlawh’ tih aiah kalpaha ‘chawl zawk’ angin an sawi ve ve bawk.
“US leh Taiwan te hian inhriatthiamna thuk tak neiin an inlaichinnaah langsar tak an duh lo ve ve” tiin prof Chen chuan a sawi bawk a.
Taiwan tan hlawkna leh chakna vek zawk a la ni tho, tia sawiin McCarthy chu Taiwan president in kum 1979 hnua US official a hmuh tawh zinga dinhmun sang ber chelh a la ni tiin a sawi.
US leh China inlaichinnaah Taiwan chu pawimawh ber niin China chuan Taiwan hi a ram bung pakhat nikhat chu mainland China nena la inzawm leh turah ngaiin a tul a nih chuan tharum pawh hman mai tur a tih reng a ni thung.
US-in Taiwan a thlawpna langsar taka a kalpui mek laiin China chuan US chu One China policy namnulah a puh a, One CHina policy hi khawvelah Chinese sorkar pakhat chauh a awm tih pawmna a ni.
He policy hnuaiah hian US chuan China nen chauh official a inzawmna neiin Taiwan nen official a inzawmna an nei lo va, mahse, Washington chuan Taipei nen sumdawnna lamah te inzawmna thuk tak neiin US chu Taiwan hnena ralthuam pe hnem ber a ni bawk.
Nikum khan US President Joe Biden chuan tum khat mai ni lo China-in Taiwan a bei a nih chuan US-in chhana a inrawlh tur thu a sawi bawk.
Hetih lai hian US chuan Asia a hma a lakna zelah Thawhlehni atang khan Philippines-ah joint naval exercise a kalpui tawha lian ber a bultan zui bawk a. US hian South China Sea a Philippines base pawimawh em em palaite chu a duhtawkin a hmang thei bawk a, heng pali zinga pathumte hi Taiwan hnaihtaka awm te an ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More