Sairangah tuilian laka himna tur din

Sairangah tuilian laka himna tur din
Sawrkar laipui Ministry of DoNER atanga sum hmuh hmanga siam, tuilian avanga chhiat tawkte tawmhimna tur ‘Safe House’ chu Sairangah siam a ni a, Ningani khan Disaster Management & Rehabilitation secretary K Lalrinzuali’n a hawng.
DM&R secretary sawi danin, 2017 May – July inkar chhunga ruah nasa tak a sur avanga Mizoram hmun hrang hranga chhiatna thleng avangin sawrkar laipui puihna – Memorandum for Seeking Central Assistance thehluh a ni a; kumin May-a Cyclone Remal avanga chhiatna nasa tak thleng avangin Memorandum for Seeking Central Assistance from NDRF ah cheng vaibelchhe 115 dil belh a ni bawk.
Tunah hian DoNER atangin kum 2017-a ruah sur nasa avanga tuilianin in leh vantlang/ sawrkar hmunhma dang a tihchhiat din that lehna atan cheng nuai 1483 hmuh a ni tawh tih a sawi.
DoNER ministry tanpuina pek hi project pathum – kawngpui leh lei siamthatna atan cheng nuai 815, thlai leh leilet lam kaihhnawiha chhia siamthatna atan nuai 333, social infrastructure-ah nuai 335-a then niin, social infrastructure hnuaiah hian Sairang leh Tlabungah tui a len changa tawmhimna tur hi ruahman niin, Sairang bik hi cheng nai 115 hmanga sak a ni. Tlabung ami pawh hi sak zawh tawh a ni a, hawn mai theih a ni tawh tih sawi a ni.
Sairang ‘Safe House’ ah hian khum 20 a dah theih a. Khuarel chhiatna, a bikin tuilian avang chhiatna a thlen thulha in leh lo chan tana riahluhna tura duan a ni. Chhiatna thila luah a nih loh changin DM&R lamin training neihna atan hman a tum a ni.