Saisihchhuah kawng laihna tur cancel tak MP-in pek leh ngen

Saisihchhuah kawng laihna tur cancel tak MP-in pek leh ngen
Myanmar ramri panna kawng, Sangau to Saisihchhuah kawng sialna atana DoNER ministry-in sum a sanction tawh, tunhnaia cancel leh tak chu Rajya Sabha MP K Vanlalvena chuan pe leh turin DoNER minster a ngen a, ani hian lo enzui a nih tur thu a hrilh.
Development of North Eastern Region (DoNER) Consultative \hutkhawm chu Union Minister of DoNER Jyotiraditya M Scindia kaihhruaiin Nilaini khan neih a ni a. DoNER hnuaia hmarchhak state-a hmasawnna hna thawh mek an thlirho.
Mizoram Rajya Sabha MP hian Parliament Monsoon Session neih zawh taka a zawhna, Union minister of state for DoNER Sukanta Majumdar-a’n Myanmar ramri panna kawng Sangau to Saisihchhuah inkar sialna atana DoNER ministry-in cheng vbch. 66.08a lo sanction tawh, cancel a ni, tia a chhan chungchang chu thutkhawmah hian a sawi chhuak a. 2021 February 10-ah he kawngpui laihna tur hi DoNER-in North Eastern Council kaltlangin sanction order a tichhuak a, hna thawk turin Mizoram PWD thlang loin Border Roads Organisation thlan an nih avanga harsatna hi awm chho ta a ni tih a sawi.
PWD ruahmanna pawm duh loin BRO hian Pangkhua paltlangin kawngpui sial an tum a, Pangkhua mipuiin compensation pek an phut si a, he project hi kal tluang lo a ni tih K Vanlalvena hian sawiin, PWD ruahman ang chuan, kawngpui hian khawchhung a paltlang dawn loh avangin compensation-ah harsatna a awm dawn lo tih a sawi a ni.
He project hi khatih laia Mizoram chief minister Zoramthanga priority list ami a nih avangin sum pek tawh hnuhkir hi a rem lo tih a sawi chhuak bawk.
Monsoon Session kaltaa DoNER minister of state-in Mizoram MP zawhna a chhan dan chuan, kumin June thlenga kawngpui laihna tur ram Mizoram sawrkarin a pek theih loh avanga he project hi cancel a ni tih pawh sawiin, border road ruahman mek Thingsai- Bualpui -Pangkhua- Sangau kawng laih tur long term project atan BRO General Staff funding atana dah nia chhan a ni.
DoNER minister chuan hemi chungchang hi hun dangah uluk zawka sawidun pui turin Rajya Sabha Mp hi a sawm a. A tul dan anga a bawhzui tur thu a sawi a ni.
DoNER Consultative thutkhawmah hian North East MP 11 an tel a ni.