Saitualah home voting ti 183

Lok Sabha inthlan atana home voting kalpui tawh chinah Saitual district-ah chuan vote 183 a tla.
District election officer Dr Lalngura Tlau sawi danin, April 8 khan Saitual district-a khaw 51-ah home voting kalpui a ni a. Home voting-ah hian kum 85 aia upa mi 135-in vote an thlak a, rualbanlo 48-in vote an thlak. Home voting tih dil leh phalsak tawh mi 11-in vote an thlak loa, inentira zin an ni tlangpui.
MP inthlan atana electoral roll hman turah Saitual district-ah hian voter 56303 an awm a, heng zingah hian service voters 518 an tel.
Election dan leh hrai kenkawh lamah nasa takin hma lak a ni tih DEO hian a sawi a. April 8 khan central armed police force (CAPF) phase khatna (ITBP) thleng tawhin, April 12 khan phase hnihna (SAPF) thleng leh tura beisei an ni. April 10 atang khan Kualmawi Keifangah Naka Check post nileng zankhuaa sipai duty-na tur bunfel a ni.
Saitual district-a critical polling station – Mimbung I, Mimbung II, NE Tlangnuam, Khawlian I & Khawlian II ah CAPF section khat theuh an inbun tawh bawk.