Saka hlawh a pung hluai dawn

English Premier League-a hmahruai mektu Arsenal chuan an player pawimawh Bukayo Saka chu contract thar an zawrh a. Conrtract thar a ziak fel a nih chuan Saka hi a hlawh a pung hluai dawn a, Arsenal player hlawh hnem ber a ni thei dawn.
Arsenal leh England player pawimawh Saka hian Arsenal-ah hian kum 2024 thleng contract a la nei a. Thla 14 lai contract la nei bawk mah se Gunners hian club lian zawk a pansan an hlau viau a, contract mawm tak an zawrh. Arsenal in contract thar an zawrh hi kum 2028 thleng daih tur a ni a, contract thar chungchangah an inrem thei a nih chuan Saka hian tuna hlawh a lak mek let thum chuang zeta tam a hlawh tawh dawn. The Sun in a tarlan danin Saka hian chawlhkar khatah £70,000 a hlawh mek a, contract thar a ziak a nih chuan kar khatah £300,000 zel a hlawh tawh dawn.
Arsenal player zinga hlawh hnem ber chu Gabriel Jesus a ni a. Manchester City atanga an lak Jesus hian chawlhkar khatah £250,000 a hlawh mek. Contract thar a ziah hunah Saka hian Jesus hlawh zat hi a khum var var dawn a, Arsenal player ni mek zinga hlawh hnem ber a ni tawh dawn. Arsenal player awm tawh zawng zawng zingah Germany midfielder Mesut Ozil kha hlawh hnem ber a ni a. Ozil khan kar khatah £350,000 zet a hlawh. Saka hi tun anga a khel tha chho a, a vul leh zual a nih a, Arsenal tan a khelh zel bawk chuan Arsenal player awm tawh zawng zawng zinga hlawh hnem ber a nih theih a rinawm.
Saka hian season kal mekah Arsenal tan goal 13 a thun tawh a, assist vawi 10 zet a nei tling tawh bawk. Beisei lawk loh taka EPL hmahruaitu an nih theih nan Saka hian Arsenal tan a thawhhlawk hle. He rawlthar duhawm hi Arsenal tan a pawimawh ang bawkin football ram ropui England tan a pawimawh em em bawk.