Sakeiin mi a tihhlum vangin Kerala-ah curfew puang

Sakeiin mi a tihhlum vangin Kerala-ah curfew puang
Wayanad, Kerala-a thuneitute chuan Pathianni khan Mananthavady Municipality-ah sakeiin hmeichhia kum 47 mi a seh avangin curfew an puang a. He sakei hi mihring ei thina puan niin tihhlum tum a ni.
Pathianni chawhma khan Forest Minister A K Saseendran chuan district thuneitu hnen atanga rawtna a dawn angin sakei hi mihring ei thinah a puang.
Curfew hi Division 1 (Pancharakolli), Division 2 (Pilakavu) leh Division 36 (Chirakkara)-ah Thawhtanni zing dar 6:00 atanga darkar 48 chhung kalpui turin puan phawt a ni.
Curfew puanna hmuna sikul, anganwadi, madrasa leh tuition center zawng zawng khar a ni.
Hmun dang zirna ina kai zirlaite pawh January 27 leh 28 bik atan hian an kai loh pawhin ngaihhnathiam an ni ang a. PSC exam leh exam dang hmachhawn ngai chu division councilor hnenah thlena ruahmanna siam tura tih an ni.
Zirtawpni tuk khan sakei hian Scheduled Caste nu, Radha-i an tih chu Mananthavady khuaa Priyadarshini Estate-a thingpui a sih laiin sakei hian a tihlum a ni.
A sehtu hi mihring ei thina puang turin a chet vel dan en chian hmasak a ni a, mi dang a beih leh mai a hlauhawm nia a lan avangin puan a ngai ta tih Minister Saseendran chuan a sawi.
Radha-i tihlumtu sakei tho hian Pathianni khan Rapid Response Team (RRT) zinga mi, Beat Forest Officer Jayasurya chu a bei leh bawk.
Saseendran-a chuan tun hi an state-a mihring ei thina sakei puan hmasak ber tum a nih thu a sawi.
Sakei laka mite an him theih nan leh tihhlum a nih theih nan ruahmanna hrang hrang siam a ni a. Wayanad-ah hian camera thar 100 bun nghal a ni a, March 31 hmain state pumah AI camera 400 bun turin tih a ni nghal bawk tih Minister Saseendran chuan a sawi.
Saseendran-a hian sakeiin a tihhlum chhungte pawh a tlawh a, a fapa tan hna pek nghal turin a ti a. Mipui him nan tihtheih apiang tih tum a nih thu leh curfew tawp hnu, Nilainiah thutkhawm leh tur a nih thu a sawi.