Sam leh vun enkawl nan balhla

Sam leh vun enkawl nan balhla
Ei pawhin a tui a, taksa hriselna atan thatna chi hrang hrang a ngah hle a, chutiang bawkin sam leh vun tan pawh balhla hi a tha hle niin Times of India health section-in an tarlang. Balhla hi vun upa hma tur vengtu tha tak a nih rualin sam nêm, mam leh tle nalh neih theih nan pawh a tha hle a ni.
Nitin balhla pakhat ei ziah hi taksa hriselna atan a that bakah vun leh sam tan pawh a tha. Balhlaah potassium a tam tih chu kan hre deuh fur tawh ang a, vitamin A,B leh C te pawh a pai hnem hle a, natural moisturizing properties a neih avangin vun tan chaw tha a ni a, mineral a pai hnem bawk avangin vun timartu tha tak a ni.
Vun tana balhla thatna:
1. Skin moisturizer: Potassium leh moisture a pai hnem a, taksa a tihnawng a, vun ro tan pawh vun tihnawngtu tha tak a ni a, vun a tinem thei bawk. Balhla-a vitamin A awm chuan vun hnawnna kal ral tur nasa takin a veng a, chu chuan vun thap leh ro te a tiziaawm thei.
2. Oil control: Balhla chu vuna cell thi paih faitu tha tak a ni.
3. Anti-ageing: Balhla-ah hian antioxidant a tam a, chu chu natural botox an tih hial a ni a, vun lang upa hma tur vengtu tha tak a ni. Vun chuar leh kum upat avanga vuna inrin neuh neuh awm tur te a tikhawtlai thei.
4. Arngeng tan a tha. Nutrient chi hrang hrang- Vitamin A, zinc leh manganese a pai hnem a, chu chu anti-inflammatory an ni. I balhla eina kawr (peel) kha paih mai loin, a chhung var lam kha i hmai hruk nan hmang la, chu chu arngeng enkawlna tha tak a ni. Arngeng nei lo tan pawh balhla kawr chhung vara hmai, nghawng leh ban velte hruk a, a ro hnu a tuia sil fai leh mai hi vun tinem a, tilang nalh theitu tha tak a ni.
Sam tana balhla thatna:
1. Balhla hian antioxidant leh antibacterial properties a nei a, chu chu luphut enkawl nan a tha hle. Luphut hi luvun ro, fungal leh bacteria avanga awm te a ni thei a, chuvangin, balhla mask luleia hnawih hian luvun a tihnawngin, luphut siamtu fungal leh bacteria te a tibo thei.
2. Sam timam tu a ni. Balhlaah hian Silica a tam a, silica chu kan taksain sam nalh taka siam tura pawimawh protein collagen siam nan a pawimawh hle a ni.
3. Sam titletu a ni. Potassium, vitamin, calcium, carbohydrate te a pai hnem bakah natural oil a pai bawk avangin balhla hi sam tana chawtha, sam timam a ti lang tle siau siau theitu a ni.
4. Sam a tithang chak. Balhla a antioxidant awm chu sam tichak a, tithang chaktu a ni. Balhla rawtkawi luleiah tat la, a ro hnuah suk fai leh mai tur a ni.