Sam thar nena 2nd round lut Alcaraz!

Sam thar han tih hluai chi phei chu a ni chiah lo a, Carlos Alcaraz kan hriat thin ang lo takin Thawhtanni zan khan US Open mipa singles champion ni thei tura rinkai zual tlemte zinga pakhat Spaniard chuan lu kawlh chungin New York-ah bul a tan a, 6-4, 7-5, 6-4-a Reilly Opelka hneh chungin second round a lut.
Second seed hian kumina a Grand Slam title pahnihna tur a beisei tawpna ber turah lan dan a rawn thlak deuh dawrh a; inkhelh ban court chhunga an kawmnaah a hair style thar chuan khelmual chhungah a tuan a tirang sawt em tih zawhna chhangin, “Mipuite ka han zawhlet ve duh chu ka haircut thar hi nalh an ti nge ti lo tih hi a ni. |hiante u, in duhzawng a ni em? An ngainat ka ring tlat a ni,” tiin fiamthu a han thawh phawt a, inkhel harsa tak a nih thu leh a tumpui kha player tawhkhirh tak a nih thuin a chhunzawm.
Kum 22 mi hian kum thum liamta khan a major trophy lak tawh panga zinga a hmasaber hi New York khawpuiah ngei a lo hlawhchhuak tawh a, kumin pawh hi Carlos Alcaraz-a kum ni leh thei tura ngaih a ni mek a, mahse, a bultanna inkhelah unseeded American Opelka khan a chhaihbuai ve viau a ni!
2022 US Open champion hian second round lamah Italy tlangval Mattia Bellucci a tum leh dawn a; nikum khan round hnihna lekah Alcaraz hi rin loh tak maiin unseeded Dutch player Botic van Zandschulp ngam loin a mualpho a, kumin chu chetsual nawn a tum tawh lo hle turah ngai phawt ang!
Inkhel dangah world number 173 Coleman Wong chuan Aleksandar Kovacevic lakah 6-4 7-5 7-6 (7-4) hnehna chang nawlhin, kum 21 leka upa qualifier Wong kha Open era chinah Hong Kong tuiliak mipate zinga Grand Slam singles match hnehna chang thei hmasaber niin, Rafael Nadal-a lawmpuina a dawng hial nghe nghe a ni.
Wong hian kum nga mi lek a nih laiin tennis a luhchilh tan a, rawlthar kum 17 mi a nihin Spain rama Nadal-a Mallorca academy-ah lutin tennis khelh a zir chho ngat ngat a, tun hi a thleng ta phawt a ni.
Brazil rama an rawlthar dahsan mek Joao Fonseca pawhin Miomir Kecmancovic hnehin second-round match pakhatah world number 21 Tomas Machac a tum leh dawn.
Kum 19 mi Fonseca hian darkar hnih leh minute 26 chhungin Serb lakah 7-6 (7-3) 7-6 (7-5) 6-3 hnehna a sualchhuak a; set thumnaah court chhunga bawlhhlawhbawm bawh rawk rawkin a va luak a, mahse, hnehnain a tawp a khar ta tho a ni.
American world number 17 Frances Tiafoe pawhin Japanese Yoshihito Nishioka laka 6-3 7-6 (8-6) 6-3 hnehna chang ve bawkin, Martin Damm a tum leh ang.
Denmark star Holger Rune chuan rim taka thawkin Dutchman Botic van de Zandschulp a hneh hram a, kum 2022 hnu lama US Open match hnehna a chan leh vawikhatna niin, 11th seed Rune hi inkhel awh rei takah 6-3 7-6 (7-4) 7-6 (7-2)-in a dingchang hram.
Ninth seed Karen Khachanov of Russia pawh set khatna hloh zet chungin American Nishesh Basavareddy lakah 6-7 (5-7) 6-3 7-5 6-1-in a chak a; Russian 15th seed Andrey Rublev pawhin 6-4 6-4 6-4-in Croatian Dino Prizmic a hneh ve bawk.
Italian 24th seed Flavio Cobolli chuan a chipui Francesco Passaro lakah darkar thum leh minute 42 zet chhungin 7-5 4-6 6-4 3-6 6-3 hnehna a sualchhuak.
Norwegian 12th seed Casper Ruud ve thung chuan darkar hnih chhungin Austrian Sebastian Ofner chu 6-1 6-2 7-6 (7-5)-in a hnawt kiang hman!
2024 US Open semi-final a thlenna kawnga set khat mah hloh lo British number one Jack Draper pawh Flushing Meadows, New York-a first round paltlang zingah telin, Argentine qualifier Federico Agustin Gomez lakah 6-4 7-5 6-7 (7-9) 6-2 hnehna a lawm.
Kum 23 mi fifth seed Draper chak ni hian Briton dang Cameron Norrie paw’n second round a lut a, ani thung hi a hahdam ta thung a, a elpui American player Sebastian Korda chuan hliam avangin a khel tluan thei lo.