Same-Sex marriage ngaihtuah zui zel

Supreme Court chuan sexual orientation chhunglam zia niin mimalin thuneihna a neih theih loh a nih avangin sorkar chuan LGBTQIA+community te ‘urban and elitist’ tia behchhan tur engmah nei si lova same-sex marriage (neih inang inneih) dan anga remtihna a hnawlsak ngawt thei lo a ti.
Centre chuan Supreme Court a same sex marriage remti tura dilna chu mi tlemte thiltithei ‘elitist’ tena an nawrna a ti a. Heng ngenna siamtute hian India thingtlang, semi-rural leh khawpuia cheng tam zawk te thlirna ai an awh lo tia sawiin a tam berte chuan inneihna chu mipa leh hmeichhia inkar turah an ngai a ti thung.
“Mahse sorkar chuan mimal te an mizia (sexual orientation) an thunun theih loh behchhana hmangin thleibikna a kalpui ngawt thei lo” tiin Chief Jusitce D.Y. Chandrachud, Constitutoonal Bench kaihruaitu chuan a sawi a.
Senior advocate A.M. Singhvi leh advocate Shadan Farasat te, mawngkawhur inkawp Utkarsh Saxena leh Ananya Kotia te aiawha ding chuan an client te chuan an identity-a bet tlat an sex leh sexual orientation avangin thleibikna leh nghaisakna nasa tak an tawk a ni, tiin an sawi ve thung a.
“Chungril lam zia tia insawi hian sorkar-in elitist emaw urban thlirna tia tanchhan a neih inchhanletna a ni a. A landanah a urban viau pawh a ni thei a, a chhan ber pawh khawpui chhuak an tam ber vang a ni,” tiin Chief Justice Chandrachud chuan a sawi a.
Chief Justice chuan sorkar chuan tun thlengin same sex inkawpna chu ‘urban characteristics’ a nihna data pholan tur a la nei lo tia sawiin, “Sorkar chuan data phawrh chhuah tur a nei lo” tiin Chief Justice Chandrachud chuan a sawi a.
Chutah Senior advocate K.V. Vishnathan chuan inrawlhna neiin sorkar in ‘elite chinte chauhin’ court an kal tia a sawi chu zahngaihna neih loh thlak tiin a sawi thung a.
“Ka client Zainab Patel hi transgender a ni a, an chenna In atanga hnawhchhuaha awmin kawtthlerah mi khawngaih dilin a awm a ni. Mahse, a theihna sawmkhawmin he khawvelah hian a dingchang a. Tunah chuan KPMG director ni tawhin National Council for Transgender Persons member a ni tawh a. Sorkar ngei hian he dinhmun chelh tura a ruat a ni,” tiin a sawi a.
Senior advocate Jayna Kothari pawhin petitioner a dinsak Akkai Padmashali chu trans activist a nih thu sawiin, kum 15 a nihin an chenna in chhuahsan lo thei lova siama awmin he khawvela intungding tura kalsana awm a ni a ti bawk a.
“Heng mite court kawngka kiktute hi working class background nei an ni a, hei vang hian sorkarin elitists tia a sawi hi a dik lo a ni,” tiin Kothari chuan a sawi bawk.
Singhvi pawhin “Social values sorkarin a kalpui te chuan equal treatment a rah hrual thei lo,” tiin a sawi bawk.
Special Marriage Act, peititoner tena gender-neutral a siam ni se an tih ber chu an inneih theihna tur a ni a, mahse chu chu socially, culturally leh legally a inneihna tia sawi mek nena insirem si lo a ni.
Senior lawyer chua sorkarin ‘inneihna hi institution pawimawh a ni’ a tih hian amah a inkalh a ni a ti bawk a. “Inneihna hi institution pawimawh a ni ngei reng a, keini community hnawla awm mek te pawh hian inneihnain a ken te kan duh ve a ni. Hetosexual te ang bawkin kan duhin phu kan ti ve a. Keini pawh inkawp derthawng tak kan nih angin inneihna in security a ken tel te kan duh ve a ni. Inneihna hi danin tax, inheritance, adoption etc a humhimna a pek angin kan hmu ve a ni,” tiin Singhvi chuan a sawi bawk.
Chief Justice Chandrachud chuan sorkarin hnial kalhna a neiha mawngkawhur emaw patil nupa tena fa lak neia an enkawl chuan naupang ‘psychology’ a khawih danglam thei a tih chungchang sawi bawkin, “Inneih te chu mawngkawhur emaw patil pawh ni se a tu emaw zawk zawk chuan fa an la thei a ni. Psychology lamah nghawng a nei ang tih hi chu danin mawngkawhurna a khap chungin dan hmang vekin same sex cheng dun tena fa an lak chu a remti tho a. A danglamna zawk chu naupang chuan nu leh pa nihna atanga hlawkna emaw awm thei te a hloh mai a ni,” tiin Chief Justice chuan a sawi bawk.