SANDE SIKUL CHANCHIN THENKHAT

On Jul 6, 2024 13 0

George L.Ralte
Vaivakawn

Kum 1700 bawr vel khan khawvel hmun thenkhatah chuan Sande Sikul hi an lo nei tawh a. Mumal leh awmze nei taka kalpui a nih tak chu kum 1780 khan a ni awm e.
Kum 1870 khan Mrs.King te inah luah man chawiin leh Sande Sikul zirtirtu te ruaiin naupang ten Pathianni apiangin Sande Sikul-ah lehkha leh thil chi hrang hrang an zir thin a. India ramah pawh Missionary lo chuang chhuak hmasate khan Sande Sikul hi an lo din sak a, kum 1800 velah khan William Carey khan Sande Sikul chu a han neih pui tan a, kum 1802 khan hnam dang hnuaihnung ho zingah thar thawh leh niin, chu erawh chu tlemin a ding rei ta deuh a ni.
Kum 1876-ah khan India ram pum huap in Sande Sikul Inkhawmpui hotute puala siam niin India Sunday School Union chu din nghal niin he pawl hi kum 1985 khan a mumal tak loh avangin Mizoramin kan zu zawmna kha tih tawp a ni nghe nghe.
Hemi hnu hian India Sunday School Association chu din ni lehin Mizoram pawhin kum 1898 khan kan Missionary hmasa te hma lo lakna a zarah kan lo nei tawh niin tarlan a ni a, hemi kum hian Mission veng tuna Press leh Bookroom inkar ah Zosaphluia khan Sande Sikul min lo din sak ta a, Pathianni hian chawhma lamah vai lianin an rawn hruai khasi ho tan Pathian thu zirna leh Pathian biak inkhawmna a buatsaihsak thin a, chawhnu lamah Mizo naupangte tan Sande Sikul buatsaih lehin he tih hun lai hi chuan Pu Zosaphluia sikul naupangte Sande Sikul naupang an ni deuh ber.
Kum 1908 a lo nih chuan Sande Sikul pawh 20 lai din a lo ni ta a. Kum 1909-ah phei chuan Sande Sikul hi khaw 20 dawn ah din niin mi tam takin Sande Sikul hi ziak leh chhiar thiam nan an hmang tangkai in, kum 1911-a Krista Tlangau (a hnu a Kristian Tlangau tih a thlak) chanchinbu chhuah tan a lo nih atang khan Sande Sikul zirlai hi thenkhat te pawh chhuah tel a lo ni ta a ni.
Kum 1917 khan India ram hmarchhak enkawltu Rev.F.J.Sandy leh a hote chuan chak taka hma lain hemi kum hian India ram Sunday School Union hriatpuinain ekzam te pawh an lo neih pui hial tawh a ni. Kum 1924 khan Miss Katie Hughes chu England ram atangin a rawn kal a, ani khan nasa takin Sande Sikul hmasawnna turin hna a thawk a, an ram a zu haw leh khan Sande Sikul hmasawnna tur hna a thawk chhunzawm leh a ni.
Kum 1935 khan Sande Sikul zawng zawng te inzawmkhawmna turin Lushai Sunday School Union din niin he pawl hotuah hian Missionary zing a mi Pi Zaii chu General Secretary hming puin a awm a.Sikul tantu Pu Zalawra chuan Asst.Secretary hna chelhin Treasurer chu Pu Niara a ni.
Kum 1936 khan Sande Sikul Department hrang hrang pathum Primary te Junior te leh Intermedia pawl te siam niin a hnu kum 1942 ah Beginner Department siam belhin kum 1954 khan Senior Department pawl hi siam belh leh a ni.Hun a lo kal zel a, Sakramen Department siam belh rilru ah lo awmin tunah hian Sakramen Department chu siam belh a lo ni ta bawk a ni.
Kum 1955 khan Lushai Sunday School Union tih tih chu Mizo Sunday School Union tiin thlak a ni a.Tun hmain Sande Sikul hian Office hrang neiin kum 1974 atang khan Office pakhat ah an lawi tawh a ni.Kum 1980 khan Mizo Sunday School Union chuan zirlai bu siam tur Committee dinin heng mite hian chak taka hma lain kum 1982 a Sande Sikul zir hman ngei turin Lession Plan leh a bu ziak hna an thawk tan a. Kum 1983 atang chuan Mizo Sunday School Union chuan Beginner pawl atanga Senior pawl zir tur siam hna chu thawk tanin Beginner pawl zirlai hi kum hnih atan siam a ni. Kum 1956 khan England ram atanga tanpuina pawisa hmuh atangin Sande sikul lam zirna hmun chu sak a ni. Mizorama Sande Sikul hi tha zawka neih chhunzawm a nih zel theih nan kum 1975 atang khan Pastor bial hrang hrang ah mawhphur tur bik Secretary siam niin heng mite hian an Pastor bial chhung a Sande Sikul hi an enkawl a ni.
Kum 1982 atangin Sande Sikul ekzam lawm man hi Synod-in a tum thin a. Kum 2007 Synod Inkhawmpui chuan Puitling Sande Sikul zirlai leh zirtirtute ekzam hi tih tawh loh ni se tiin a rel a ni.
Sande Sikul chanchin tlangpui ka rawn thailanah hian ziah dik loh lai leh tih tih dik loh lai tam tak a awm mai thei.Hemi chungchangah hian chhiartute in mi hriat thiamna ka rawn dil a ni.