Sangha khawia hmalakna tur pawm

Sangha khawia hmalakna tur pawm
District Level Committee on Prandhan Mantri Matsya Sampada Yojana (PMMSY), Champhai District chu Nilaini khan an chairman, bawrhsap James Lalrinchhana hoin an thukhawm a. Centrally sponsored scheme – PMMSY 2022- 2023 hnuaia hamthatna dawngtu tur an thlan bakah sangha khawi tihhmasawnna tura ruahmanna duan lawk, PMMSY kaltlanga hmalakna tur Champhai District Fisheries Annual Action Plan for Financial Year 2023- 2024 thlir hoin an pawm a ni.
PMMSY 2022- 2023 kaltlanga tanpuina diltute dilna chu tehfung duansa hmanga zirchian a ni a. PMMSY kaltlanga hmalakna tur pathum hnuaiah hian diltu mi 306 an awm a; heng zinga 146 chu hamthatna dawng tura pawm an ni. Mi 80 chu dil thar siam tur, 38 chu dil awmsa sangha no dah lailawkna – rearing pond siam tur leh 28 chu leilet buh kara sangha khawi hamthatna dawng tura thlan an ni.
PMMSY kaltlangin District Fisheries Annual Action Plan 2023- 2024 hnuaiah hmalakna tur component 7 duan a ni a. Ruahman dan chuan hmalakna tura duan atanga senso ngai hi cheng nuai 364.40 a ni. Cluster based location anga kalpui tum niin, dil thar hectare (Ha) 15-a zau siamna’n nuai 126, sangha note khawina Ha. 8-a zau siamna’n nuai 56, sangha leh buh emaw ran emaw enkawl kawpna kalpuina’n ram Ha. 25-a zauah nuai 25, sangha chi thar chhuahna pahnih siamna’n nuai 50, freshwater aquaculture hnuaia hmalakna’n Ha. 15-a zauah nuai 60, bio floc pond pathum siamna’n nuai 22.50 leh refrigerated vehicle pakhat atan nuai 20 chu zirchian hnu ah pawm a ni.
Thutkhawm zawh hian PMMSY 2020- 2021 sangha khawina hmun Tlangsama sangho note tharchhuahna siam chu tlawh nghal niin, hmalakna enfiah a ni.
PMMSY kalpui turin sawrkar lamin senso zaa 60 leh mimalin senso zaa 40 an tum thin a. Sawrkar sen ngai atanga zaa 90 chu sawrkar laipui tum tur niin, zaa 10 chu state sawrkar tum tura tih a ni bawk.
Fisheries department Champhai tarlan danin, kum 2021- 2022 chhungin Champhai district-a sangha khawitu 1380 te enkawl sangha dil hectare 456.35 a zau atangin sangha metric ton 369.64 thar a ni.