Sangha khawnvartui rim nam chhan la hre lo

Tun hnaiah Mizorama sangha lakluhah khawnvartui
rim nam a awm a, hei a chhan hriat a la ni lo.
Mizorama lakluh rohu sanghaah khawnvartui rim nam a awm a, tam chu a ni lo. A hringah chuan a nam lo a, chhum emaw kan emawa a hu a chhuahin khawnvartui rim hi a nam thin. Health & Family Welfare department hnuaia Food & Drugs Administration Wing-in thil awmzia hriat tumin an bei nghal a, mahse a chhan han sawi tur a awm rih lo.
Food & Drugs Administration Wing hotute chuan a enfiahna tur an la zawng hmu lo tih an sawi a, Mizoram pawna laboratory hrang hrang an biakte pawhin khawnvartui rim nam chhan enna tur an neih loh bakah, an lo bangbo hle tih te an sawi.
Sangha hi a chhiat har nan leh a uih har nan formalin an hmang thin a, antibiotic an hmang thin bawk. Chutiang chu Mizoramah a enfiah theih a, khawnvartui rim nam erawh an vawi khat hriatna niin, a enfiahna hi Mizoramah a awm lo. Hmun danga laboratory hrang hrang an bia a, anni pawhin khawnvartui rim nam chhan endikna tur tak hi chu an lo nei lo a, sanghain khawnvartui rim a nam pawh an vawi khat hriatna a nih thu an lo sawi tih thu dawn a ni.
Food & Drugs Administration Wing hotute chuan laboratory hrang hrang an biak thu leh Central Food Laboratory, Kolkata meuh pawhin a enfiahna tur hi an lo nei lo tih an sawi.
Formalin leh antibiotic te chu sangha chhiat har nen leh a uih har nan tea hman a nih thu leh, khawnvartui hi eng atana hman tur nge ni ang tih pawh mithiamte pawhin an hriat bik loh thu te an sawi bawk.
Tun hnaiah Meghalaya-ah formalin hmanna sangha a awm tih an hrechhuak a, Food & Drugs Administration Wing hotute chuan Mizoramah chuan hetiang a awm an hriat loh thu leh, tun hnaia an endikah Mizoram a him thu te, kum thum vel liam taah khan formalin hmanna hi chu an lo hriatchhuah ve tawh thu te an sawi.