SANGHMINGTHANGA HNAMTE A LIAM TA MAW… (1955 – 24.10.2024)

Ramhluna Hnamte

Ka patea fapa, ka cousin, ka nau, ka ngainat leh kawm ngeih em em Sanghmingthanga Hnamte chuan cancer natna huatthlala tak avangin October ni 24, 2024 (Ningani) chawhnu dar 3:45 khan LRM Hospital-ah chatuan ram min lo pan san ta a, a ruang zuiin Leitlangpuiah kal vein ka va vui ve a ni. He thu ka ziah ni hi a chawlhkar khatna chiah a ni ta, a pualin, lungleng takin article ka ziak ta a nih hi.
Ka unaupa hi damlo rei tak a ni lo na a, a natna erawh chu na takin a tuar rei hle thung a, a lainatawm hle a ni. He lam hi chu sawi thui ka tum lem lo e. Cousin kan ni a, ka aia kum khat leka naupang ni mah se mi a u en thiamin min zah thiam em em thin. Lunglei Zohnuaiah in leh lo neiin ka High School kal laiin an inah hian kum khat ka awm a, pianghmun unau kan ni lo tih reng reng hriat lohvin amah leh a unaute ho nen hian kan khawsa a ni. An unau hian rimawi ngaina leh zai lama tui em em an ni. A u chiah Sangliana Hnamte, tuna Serchhip khawpuia inbengbel ta hi seventies leh eighties lai vela AIR Aizawl artiste (lengzem leh gospel) lar tak thin a ni. Unaupa Sanghminga hi Shillong-a ka lehkha zir laiin college kal turin a rawn awm ve a, nasa takin kan inzui a. University ka kal hnuah ka in luah XANADU ah khan ka cousin pakhat Lalmuansanga Hnamte nen kan awm ho a ni. Zai lama tui tak an nih ve ve avangin AIR Shillong leh AIR Aizawla hla ka record in min pui thin a, Lalmuansanga phei hi chuan a hlaphuah te min sak tir a, a fuh hlawm ta phian leh nghal a, ka nihlawh hle a ni. Anni pahnih hi AIR Shillong-ah voice test pal tlang ve ve in, Muansanga erawh chu hla record tura koh a nih hian Zorama a awm tawh avangin AIR Shillong-ah hian hla a record ve hman ta lo a ni. Sanghminga pawh hi hla phuah thiam tho a ni a, Shillonga kan awm ho laiin a nu a thi a, a nu pualin hla tha tak, fam ngaih hla a phuah a, AIR Shillong-ah a record nghe nghe a ni. AIR Shillong-ah hian vawi khat chiah a record a, ka hla pawh pahnih lai min sak sak ve nghe nghe a ni. Mi inthukru tak a nih avangin AIR artist a nih hi hria an awm tam lo mai thei, AIR Artist B Grade ngat a ni a, zai zui zel ta se B High Grade pawh a kai mai thei a ni.
Sanghmingthanga hian zai a thiam a, midang zai mawi taka part pek a thiam em em bawk a ni. Radio-a Lalnunmawia Valtea zai thenkhatah part mawi takin a pek sak bawk. AIR Shillong leh Aizawl a ka hle record thenkhat beisei ai daiha mi hriat a hlawh ve thinna chhan pakhat pawh hi mawi tak, sang veh vawh tak maia part a lo pe vau vau mai khan kan zai kha a chawih mawi zual em em a, khang hun laia AIR Aizawl leh Shillong-a zawhna leh chhanna hun an siam thinah pawh ka hla sak thenkhata part mawi danglam taka petu hi tunge a nih zawhna an dawng fo tih AIR Aizawl / Shillonga thawkte khan min hrilh fo a ni.
Music-ah a tui a, guitar pawh a play thei hle thin a, bass guitar a tui pui leh zual. Khang lai khan bass guitar pangngai kan hmu ve pha ngai lo a, acoustic guitar hi bass guitar angin kan hmang mai thin a, kan play thiam em em tho. Khang hun laia AIR Aizawl/Shillong-a Mizo zai tam tak kha acoustic bass guitar a rem a tam hle, a mawi em em tho. High School kan kal lai, an ina ka awm lai kha Jesse Lalrova leh a ‘Aw Herthuli’ hla ropui lar vanglai kha a ni a. Kha hla kha ‘bass-guitar oriented’ tak mai kha a ni a, nalh leh mawi hi kan han ti thei lai leng khawp a. Radio-a a zai a rawn chhuah tawh chuan radio hnaih tak mai khan kan han ngaithla ta thin a, a bass kal dan kha kan ‘hmui’ in kan han zir a, hmui na na na kha chuan kha bass kal kual dan kha kan thiam nal nasa, unaupa Sanghminga hian a thiam zual. Vawikhat chu Exam lai khan exam zawh thuai thuaia Herthuli hla ngei kha bass perh chunga play a chakzia a sawi thin a. A exam zawh ni chuan le….a ute guitar tuk chawp kan hman thiam ve em em kha a kuah nghal chat a, Herthuli hla chu thiam ang anga sain chu tualchher tingtang ngei chuan nileng deuhthawin kan Lunglei Zohnuai inpui ngeiah chuan pawn chhuak miah lovin a inkhurbing ta niin ka hria. A va lunglenthlakin a va ngaihawm ta ve.
Shillong atanga BA a zawh hnu hi Accounts lamah kalin a thih ni thlengin Lunglei Treasury Office-ah a hun tam zawk thawkin Asst.T.O in a retired ve ta a. Kohhran upa a nih angin an kohhran leh khawtlang tan theihtawpa a hun hmang vein kum 69 mi niin mual min lo liam san ve ta a ni. Ti hian ka thiam tawkin ka unaupa ka ui thu leh ka sunna ka han ziak ve a ni e.
“Engan nge maw thlafam dairial i lo chan le…..ka phal lo che aw , ka phal lul lo” Ramhluna Hnamte (circa 1980).