Sania Mirza IG post-in thulengvak a titam

Indian tennis star Sania Mirza leh a pasal, Pakistan cricketer Shohaib Malik te chu an inthen niin hman deuh atang khan thu a thang tawh a, mahse, an nupa chungchangah hian engmah thupuan an nei lo. Tun tumah hian Sania Instagram Story-ah, “Ka biak chuan, ka ngaihtuah tihna a nia. Ka reh hmak chuan ka duhtawk tawh e tihna a ni mai,” tih a rawn lang leh ta nawlh mai a, hei hian an nupa inkar boruak thulengvak a titam leh ta a ni.
Report thenkhatah chuan Sania leh Sohaib te hi an awm hrang tawh a, an fapa Izhaan erawh an enkawl dun niin an tarlang a, an nupa hian an inkar thuah official-in engmah an la puang lo thung. Sania leh Sohaib te hi 2010 khan an innei a, 2018-ah fapa Izhaan an nei a ni.
Tunhnaiah Sania hi a thiante inneihnaah amahin a tei ve nawlh nawlh mai a, Bollywood star Parineeti Chopra te inneihna Udaipur-ah pawhin amahin a kal tlat bawk.