Sars lêng lailangtu Chinese doctor boral
Jiang Yanyong, China military surgeon hlui leh kum 2003 Sars epidemic len laia Chinese thuneituten an thup tia lailangtu chu kum 91 mi niin a thi.
Yanyong hi Beijing-ah pneumonia vangin a thi a, Sars crisis thlen tirhah khan a auchhuah avangin nunna tam tak chhanin a awm phaha ngaih a ni a. Mahse, China thuneitute chuan hrem thungin pawn chhuak thei lovin an dah reng nghe nghe a ni.
Sars khan khawvel pumah kum 2003 khan mi 8,000 chuang kai hmanin heng zinga mi 774 chuan nunna an chan phah tiin World Health Organization (WHO) chuan a sawi.
April 2003 khan Dr Jiang chu Beijing hospital-a a thawh laiin Chinese health minister chu mipuite hnenah respiratory disease hlauhawm tak a leng mek tiin lehkhathawnin a hrilh a. Sars vanga nunna chan 100 chuang an awm tawh thu sawiin chung mite chu miliatry damdawi ina thi te vek an nih thu ziakin a hrilh a ni.
A lehkhathawnah chuan official tena dawt an sawi dan ziakin Chinese state broadcaster te chuan dawt an thehdarh a ti bawk a. A lehkhathawn hi foreign media ten hmu fuh hlauhin an thehdarh zui ta a ni.
A lehkhathawn avangin China sorkar chuan ngaihdam dilin WHO pawh a inrawlh zui theih phah a. Zan khat thil thuah khuahkhirhna khauh tak kalpui nghalin Sars leng darh tur thunun a nihzui theih phah a ni.
Mahse, a lehkhathawn chuan khatih laia China health minister leh Beijing mayor te banna a thlen thung a.
“Thil awm dan kha ka laihlan a ngaiah ka ngai a, China him nan chauh ni lo khawvel tana pawimawh a ni,” tiin a hnuah Dr Jiang chuan a sawi.
A kum lehah Dr Jiang chuan Beijing chu cho lehin Chinese Communist Party (CCP) chu kum 1989 a Tiananmen Square crackdown chu an tihdik loh tih pawm turin a ti a, kha thil thlengah khan mi sang chuangin nunna an chan phah a ni.
Dr Jiang kha kum 1931-ah Hangzhou-ah banking family hausa zet atanga piang niin, a Ni tuberculosis natna avanga a thih hnuah medicine a zir zui a. Fapa leh fanu a nei bawk.
A dam chhungin a hnathawh that avangin chawimawina hrang hrang dawngin chung zingah chuan kum 2004 khan chawimawina sang Ramon Magsaysay Award for Public Service a dawng nghe nghe a. “China tihthan ngawih chuh thiatin Sars-ah thudik a puantir” tiin citation chuan a sawi nghe nghe.