Sava leh ramsa kaptute jail-ah

Forest Environment & Climate Change department thawktuten an man, sava 142 leh thehlei 7 kaptu mi pathum chu thubuai siamsak an nih hnu ah Central Jail-a dahluh an ni.
February 10 khan EF&CC department hnuaia Seling Forest Range leh Tawi Wildlife Sanctuary staff-te chuan joint patrolling neiin, tuna an mante hi Tlungvel khaw daiah an sava leh thehlei kahhlum bakah an kahhlumna hmanrua mansakin, Inrinni zan a nih bakah a tuk Parthianni a ni bawk nen, Thawhtanni khan Aizawl Wildlife Division office-ah in report tura hriattir an ni. Hemi ni vek hian mag strate hmaa hruai niin, Central Jail-a dah luh nghal an ni.
Hmanrua mansakte hi Air Rifle pahnih leh a mu box khat, SBBL pakhat leh a mu 15 bakah hand pump (air pump) pakhat mansak an ni. Dan loa ramsa kaptute hi Lalchhuanawma (33) leh Lalthazuala (41), Tlungvel Venghlun ve ve leh HS Tlangkhuma (68) Tlungvel Vengthar an ni.
Sava an kahhlum hi Tukhumvilik – 108, Vahui – 10, Tuklo – 10, Kawlrit – 10, Vate – 2, Kulherh – 1, Liandorit – 1 bakah thehlei an kahhlum hi Hleikapsen 3, Hleilubial 2 leh Hleimeipar 2 an ni.
. Sava leh thehlei kahna hmun hi Phulmawi ram, Zawngsih hmun niin a kaptute hian an sawi na a, Tawi Wildlife Sanctuary hnaih lam a nih avangin sanctuary chhung ami a nih leh nih loh chhuichian mek a ni tih EF&CC department hotute chuan an sawi.
Tunlai huna ramsa leh sava veh ching an la awm fo chu EF&CC department chuan pawi a tiin a ngaimawh takzet tih sawiin, dan bawhchhe lo turin mitin a ngen nawn a. Dan ang chuan hetiang titute hi kum thum thleng lung in tantir emaw Rs. 25000 thleng chawitir emaw, a pahnih hmanga hrem khawp theih an nih bakah wildlife sanctuary chhunga thil thleng a nih phei chuan hremna hi a leta tih nat theih a ni tih an sawi.