Sawhthing chingtu 25102 atangin Sawhthing tâmin 6500+ nghawng

Mizoram pumah sawhthing chingtu chhungkaw 25102 an awm a; heng zinga chhungkaw 6582 chu sawhthing tâmin a nghawng tawh a; an la pun belh zel tura ngaih a ni. Horticulture department chhinchhiah danin, Mizoram sawrkarin thlai tharchhuah a lei tur zinga thlai pali a telh zingah sawhthing hian buaipuitu a nghah ber a, district zawng zawng (11) ah an ching. Hriat theih chinah chhungkaw 25102-in an ching a; Serchhip district-ah tam berin, Saitual, Champhai, Khawzawl leh Aizawl district ah an ching tam zual.
Aieng chingtu chhungkaw 3415 an awm a; A chingtu tam zualna chu – Lunglei, Aizawl, Kolasib, Saitual leh Champhai a ni.Mizo hmarchate pawh district zawng zawngah a chingtu an awm a; chhungkaw 8687 an ni. Aizawl, Serchhip, Khawzawl, Lunglei leh Saitual chu chingtu an tam zualna a ni.
Sawhthing bik hi tunhnaiah district hrang hrang atangin a tam tih report dawn a ni a. District horticulture officer-te report lut khawm atangin August 12 thleng khan khaw 263-a chhungkaw 6586 te sawhthing a tâm tawh.
Sawhthing tâm hi a darh zau zel loh nan Horticulture department chuan hma la nghalin, district tina officer leh field staff ho chu Aizawlah kokhawmin Thawhlehni khan sawhthing tâm leh natna ven dan leh enkawl dan a zirpui a. An ni hian kuthnathawktute pui turin Zirtawpni hian ‘Operation Ginger 2024’ beihpui thlak turin an thawkchhuak dawn a ni.
District tinah sawhthing hi a tâm tawh avangin, kuthnathawktute hmalakna a thamral loh nan tih tak meuha a dolet beihpui thlak a ngai tih Horticulture department hotute chuan sawiin, department officer leh field staff-te chu kuthnathawktute puitu ni thei tura an intuaihriam a, tan an lakpui a ngai, tiin an inchah a ni.
Sawhthing chu a tam thama chin chuan a tâm thei tih an hriat sa avangin a chi pawh an chiah a, theih ang tawka an lo inpuahchah lawk ve mah se, fimkhur dan leh thiam dan a inchen loa, tun hi kan thleng ta tih an sawi a. Sawrkar flagship programme a hlawhchham lohna tur leh kuthnathawktute harsatna sukiang turin beihpui thlak a tul tiin an infuih a ni.
8 Horticulture mithiamte sawi danin, ‘sawhthing tâm’ tia sawi chu natna hrang hrang vanga thleng thin a ni.
8 A tawih hri (rhizome rot), a tawih uih hri (bacterial wilt) leh a kung hreuhtu (shoot borer) tih te an ni a. Chhan dang awm thei bawk mah se, heng thil pathum hi uluk taka ven chuan sawhthing hi zaa 80-90 chu venhim theih tura ngaih a ni.
8 Heng natna pathum bakah hian natna leh tichhe theitu dang panga vel a la awm a. Hlawhtling taka sawhthing ching tur chuan – a chi hrisel leh tha chauh lin, a chi uluk taka dahthat dawn leh lin dawna chiah (hmuar venna leh rannung thahna chawhpawlh), a chinna hmun thlan uluk (tui luan ral zung zung theihna ang chi te), phun atanga thla 1 – thla khat leh a chanve vel atanga a tâm venna damdawia ni 20 kar dana kah leh, a hun taka lei tha pek te a pawimawh tih sawi a ni.
8 Heng doletna tur hian Horticulture department-aa thawktute district tin tuamin an fehchhuak dawn a. Sawhthing natna, a bawmtu rannung leh a enkawl dan lehkhabu sem a nih dawn bakah a enkawlna damdawi pawh theih ang angin ngaihtuah a ni.