Sawhthing hralh dan tur sawikhawm ‘Ginger Capital of India’ ah Mizoram

Mizoram sawrkar leh NITI Aayog tangdun chuan Mizoram sawhthing tharchhuah pung chho mek chungchanga inrawnkhawm leh sawihona New Delhi-ah Thawhtanni khan an buatsaih a, chief minister Lalduhoma a tel.
He inrawnkhawm hi chief minister, Council of Ministers leh NITI Aayog duan chhuah a ni a, a tum ber chu Mizorama kuthnathawktute thar sawhthing lei leh hralh kawnga harsatna sutkian dan tur zawn leh market tha zawk, loneituten an hlawkpui lehzual tur dapchhuah tum a ni.
Mizorama sawhthing sawngbawlna tha zawk neih leh India ram chhung leh khawvel hmun zau zawka sawhthing thawnchhuah dan tur an sawi a. Kuthnathawktu pawl (FPOs), industry leh sumdawng (entrepreneur) tana kalphung tha zawk leh sawhthing chin leh hralh kawngah ‘strategic action plan’ pawh sawi a ni.
Chief minister chuan, Mizoram chu tun kum hnih vel chhungin India rama sawhthing thar tam ber pawlah a inhlangkai a. Hmundang ami aiin a quality a sang deuh zawka hriat a ni tih a sawi. Sawhthing chingtute tan Mizoram sawrkar chuan kg khatah support price Rs.50 a pe a. Kuthnathawktute tanpui duhna thinlung pu, hlawhtlin ngei tum sumdawng (investor) chu Mizoram sawrkarin lawm takin a thawhpuiin a dawngsawng thei reng tih a sawi a ni.
Investor-te tana hma lak awlsam tur zawngin sawrkarin industry leh investment policy a siamtha tih sawiin, “Sawhthing mai ni lo, thlai thar dang lei leh sawngbawl kawngah investor-te tan sawrkar kan inhawng hle a ni,” a ti.
Kumin December 5&6 hian Aizawlah sawhthing Buyer- Seller Meet siam turah tun tum inrawnkhawma tel investor-te chu tel vek turin a sawm nghal a ni.
Hun khatnaah Agriculture & Farmers’ Welfare special secretary Ramdinliani’n Mizoram sawrkar aiawhin presentation a nei a. Hun hnihnaah industry, FPO leh academia-te nen Mizorama sawhthing tharchhuah hralhna leh sawngbawl zui kawnga hmasawnna tur leh insumdawn tawnna tur sawiho a ni. Hun thumnaah Mizoram leh sawrkar laipuia mi pawimawhten thu an sawi a. Sawrkar laipui hotute leh industry neitu aiawh mi 60 chuang an tel a ni.
NITI Aayog rawtna siam dan chuan, Mizoram chu ‘Ginger Capital of India’ tih nise, sawhthing hi organic a nih zel theihnan hma lak nise, technology sang zawk nen a processing kalpui dan zawn nise, India ram chhung chauh ni lo ram pawna thawn tuma hma lak nise, an ti a. An rawtna hi chak taka bawhzui turin thutlukna an siam a ni.