Sawhthing hralhtu rinawm lo an awm hi a pawi hle – ZPM

Sawhthing hralhtu rinawm lo
an awm hi a pawi hle – ZPM
Tunhnaia phaia sawhthing thawnchhuahnaa sawhthing hralhtu zingah rinawm lo an awm chu sawhthing hralh zelna turah nghawng a neih avangin a pawi hle tih ZPM party chuan an sawi.
ZPM Gen. Hqrs. thuchhuak chuan, kalphung thar mipui sawrkarin kuthnathawktute bana kaih policy a taka a kalpui mek laiin, February 20-a sawrkarin sawhthing a lei, khaw pahnih atanga thawn chhuah chu a chhe hle tih hmuhchhuah a ni tih sawiin, Mizoram sawrkarin a thawhpui, a latu Reliance Company-in sawhthing hi thawn chhunzawm tawh rih lo tura thutlukna a siam hial chu a hnam anga mualphonaah a ngai a, pawi a tiin kuthnathawktute inenfiah turin a chah tih a sawi.
Mizoram Agricultural Marketing Board hruaituten sawhthing lei leh hralh chungchangah ‘Mizote chu hnamdangin sumdawnpui tlaka min ngaih theihnan kan rinawm tur a ni a, kan sawhthing hralh tur pawh a fai tha tur a ni’ tiin vawi tam mipui zirtirna thu an lo aupui tawh tih ZPM thuchhuak chuan sawiin, ‘Hemi hnua khaw thenkhata kuthnathawktuten zawm duh loa, sawhthing fai tha lo leh hralh chhuah tlak loh an thawn chhuak lui hian sawrkar hmalak lehzelna turah harsatna a thlen a, kuthnathawktu rinawm tak tak tan harsatna lian tak a thlen mek a ni,’ a ti.
Sawrkar flagship programme hlawhtlin leh hlawhchham kawngah kuthnthawktuten mawh an phur lian hle tih inhria a, tun hnuah hetiang thil hi a thlen nawn tawh lohnan rilru dik tak pu turin ZPM Gen. Hqrs chuan a ngen tih a sawi a. Bana kaih tlak loh thlai thar sawrkarin a lei chhunzawm sak theih loh khua an awm a nih pawhin hma an lak pui thei dawn lo tih a sawi.