Sawhthing leinaa sum chingpena sawi chhuichiang turin ACB ngen

Sawhthing leinaa sum chingpena
sawi chhuichiang turin ACB ngen
Sawrkarin sawhthing a leinaa sum tihchingpen awm nia sawi chu chhuichiang turin Anti Corrruption Bureau hnenah ngen a ni.
Social activist Vanramchhuangi’n ACB office in charge hnena FIR a thehluha a inziah danin, sawhthing leina sum cheng vaibelchhe 4/5 vel a chingpen niin Agriculture minister-in a sawi a. Sawhthing leiah buaina dang pawh awmin, ram dang (foreign country) Burma sawhthing la lut a, tualchhung thar anga sawrkarin Mizoram kuthnathawktute sawhthing thar a leisak zinga hralh tura lo commission an awm tih pawh a sawi chiang tih a sawi a ni.
‘Hei hi thil ngaimawhawm tawpkhawk a nih avangin, mipui sum tam tak tichingpentu hi tute pawh nise, dan anga chhui a, an phu tawk hremna an hmuh ngei theihnan FIR hi ka thehlut a ni,’ a ti.
Mipui sum (public fund/ money) tihchingpen, minister-in media kaltlanga a puanzar, vawiin thlenga chhuizui ni lo leh criminal case siamsak an la awm lo chu thil zahthlak leh state mualphona nia a hriat thu Vanramchhuangi hian sawiin, he thil hi ACB-in hma a lak loh chuan khua leh tuiten sawrkarah rinna nghah harsa an ti zual sawt dawn tih a sawi.
‘A rang thei ang bera mipui sum tichingpentute chhui a, hrem an nih ngei theihnan man chhuak turin ka ngen che u a ni,’ a ti.