Sawhthing man san lai ber thleng

Kum hnih chhunga Mizoram-a sawhthing man that lai ber a thleng a, kg khat Rs.50 chunglam vek a ni mek.
Thudawn danin, May 4 khan Mizoram sawrkarin Secondary Collection Centre a ruahman hrang hrangah sawhthing hi kg ah Rs.50 chunglam vek a ni a, a thenah phei chuan Rs. 60 a kai thuak.
Thawhtannia SCC hrang hranga sawhthing auction-naah kg. ah Rs. 51-55 inkar a ni fur hlawm tih thu dawn a ni a. Hriat theih chinah Rs. 59.50 chu chhan san berna a ni.
Kum kalta khan sawhthing hi a rate san lai berin kg. ah Rs.30 vel a ni tih sawi a ni a. Kuminah sawrkarin sawhthing rate hi Rs. 40-45 inkar turin ruahman chhin mah se, hun engemawchen chu hemi rate ang hian lei duh an awm lo.
Hetihlai hian sawrkarin, tualchhungmite ruahman anga sawhthing sawngbawlna – ‘Rapchung technology’ leh ‘Tapchhak technology’ hmanga sawhthing zai lep tih ro na khawl a siamtir chu Thawhtanni khan Sairanga sawhthing sawngbawlna hmunah enchhin a ni tih Mizoram Agriculture Marketing Board chuan an sawi a. Khawl hi a taka hman theih tura peih a nih hun chuan thlai thar deh ral kawngah a pui hle dawn tih an sawi a ni.