Sawhthing thartuten hrehawm ti

Tunhnaiah Reliance Retail Limited hnena hralh tur sawhthing thawn chhuah a ni a, sawhthingah hian a chhia a tam tih hriat a nih thu chu titi a tling mek. Sawhthing neitu khua Sailam leh Chamring te’n hrehawm an ti hle tih sawi a ni. Ropuiliani Women Farmer Producer Company Limited (RWFPCL) in khaw pahniha an lakkhawm thawn chhuah a ni a, RWFPCL hian sawhthing lakkhawm hi ‘sample’ tur a ni tih an hre lo tih sawi a ni.
Thudawn danin, thuneitu lamin RWFPL hnenah ni thum chhungin sawhthing metric ton 10 mamawh a ni a, an nei hman angem tih an zawt a, VC inthlan dawn a ni si a tiin, neih hman an inrin loh thua an chhan hnuah quintal 50 an nei thei angem, tih an zawt leh a, Sailam leh Chamring-ah quintal 50 neih hman an tum ta a ni.
Sailam chhungkaw 30-in kg 161 vel Theuh, Chamring chhungkaw 25-in quintal 2 vel Theuh an tum ta a, chu’ngah chuan a chhia engemawzat a lo awm tih thawn chhuah hnuah hriat a ni.
Sawhthing neitu khuate’n hrehawm an ti a, chutih rual chuan an bangbo bawk. Chhungkaw khatin sawhthing tlem azawng an hralh a, chumi kara a chhia lo dah ru duh chu a awm theih dawn em ni, tih chu zawhna a ni a; tam tham karah chuan miin a chhia lo pawlh ru se thuhran a ni a, an ti. Tum danga an hralh dan nen a inang an ti a, uluk tura an inchah avangin an uluk tlanga an hriat thu an sawi.
“Sawhthing hmun nei ngai lo leh a lei ngai lo tan chuan hriatthiam loh tur a tam ang,” tiin Sailam pa pakhat a hming tarlan duh lo chuan a sawi. Sawhthing hi a chhe hma tih te, bag-a khung khawm a nih avangin a thlar a tliak duh tih te, chawhna lamah pawh a khem nengnung zel tih te, lei a kai a, silfai rual a ni lo tih te, chutiang hre chung chuan kum dangah pawh Vaiin an lei a, a chhia a lo awm chang pawh a awm tih a sawi. Tun Tuma an sawhthing hi hnawhsarum taka chawh leh thawn chhuah a ni tih a sawi bawk.
Sawhthing hi a tâm a, a tâm hi a kal laklawh chuan chawh laiin hriat loh mah se, him piala lang pawh ni hnih khat hnu lekah a hmelhem hman tih an sawi a, chutiang chu a nih pawh an ring.
“Inpuang an awm a nih loh chuan han hriat chhuah rual a ni loa, chuvangin tuman a chhia an telh ru lo, tia sawi chu a theih loh ang. Mahse hetiang zat lek kara a chhia han telh kha an duh dawn em ni kan ti a. Sawhthing hre vak lovin mak an lo ti ta viau a ni thei angem kan ti bawk,” Sailam pa hian a ti. “Sual vang ni lo, vanduai thil a awm thei tih miin min hriatpui se kan duh khawp mai,” a ti bawk.
Sawhthing hi ‘sample’ tur a ni tih an hre loa, chutiang tur a ni tih hria se basket-a dah tur a ni a, an ti. Serthlum pawh a leitute’n uluk deuh an duh chuan ipah dah lovin basket-ah an dah Thin a, sawhthing phei chu ipa a awm chhung hian a thlar a tliakin a hmelhem hma a, a leitute pawhin chumi chu an ‘risk’ Thin tih an sawi.