Sawhthingah support pricecheng vbch.96 pe tling tawh

Sawhthingah support price
cheng vbch.96 pe tling tawh
Mizoram sawrkarin thlai thar lei tura a tih zing ami sawhthingah a chingtute hnena support price a pek tawh chu cheng vaibelchhe 96.4 a ni.
Mizoram Agriculture Marketing Board (MAMB) chuan tun sawrkarin thlai thar pali lei tura a puan lawk, tun sawrkar kum chhunga a lei kharna chu Thawhtanni khan hman a ni a. Heta report danin, sawrkar hian kumin June 27 thleng khan sawhthing quintals 233604 a lei tawh a, June 30 thleng khan an la buk. An lei tawh chinah support price hi vbch. 96.4 a pe tawh a ni.
Aieng quintal 400 leiin, hmarcha leisak ngai an awm lo. Hmunphiah hi empanelled buyer-ten quintal 10552, non empanelled buyer-ten quintal 27277 an lei a, ZOHANCO kaltlangin quintal 2498 lei a ni. Hemi bikah hian sawrkarin cheng vbch. 2 a seng.
Thlai thar lei tur pali bakah Mizo buh quintal 1473 lei niin, cheng nuai 44 vel sawrkarin a seng a ni.
Thlai thar lei kharna hmanpuitu chief minister Lalduhoma chuan, kumin February 20 atanga sawhthing lei an kalpui atangin JUne 30 chu thla 4 leh ni 10-na chiah a ni, tiin, tunah chuan a mothar a awm tawh a, khar rih mai thain an hria tih a sawi.
“Sawrkar kan insengso nasa a, cheng vaibelchhe za vel kan senral ka ring. Kan theihtawka kan hralh ve bakah sawrkar laipui market intervention scheme atangin cheng vbch. 9 vel hmuh kan beisei. Kan loneitute hi kawng lakah kan kalsan dawn loa, nakkum lamah pawh kan kalpui zel ang,” a ti.