Mizoram sawrkar hnuaia department tinte data dahkhawmna tur leh project thehluh leh a kalpui dan dahkhawmna tur dashboard pahnih chu sawrkarin a siam thar a. Thawhtanni khan heng thil pahnih – Sustainable Development Goals Dashboard leh Project Monitoring Committee Dashboard (MPLAN) hi chief minister Lalduhoma chuan a hawng.
Dashboard pahnih chu data dik tak thunluh hmanga kalpui tur a ni a. Data dik lo kan thun chuan kan dinhmun dik tawk lo min pho chhuah tir dawn tih chief minister hian sawiin, “Department tinin data dik tak chauh thun turin ka chah a. Data dik a nih phawt chuan tlakhniam deuh pawh hreh lo ang u. Kan dinhmun dik tak kan hriat kha a pawimawh hmasa a ni,” a ti.
Project-te chu khuarei daih (sustainable) hmasawnna min thlentu an nih a ngai tih a sawi a. Project thenkhat chu tha tak angin lang mah se, kawng danga min tichhetu a ni ve thei, tiin, project khuarei daih leh tha zel thlan thiam a ngai tih a sawi. Project kal fuh tawk lo, hlamzuih, a huna zo thei lo a awm lohnana vil rengtu tur Project Monitoring Committee an nei tih sawiin, “Kan project hi kaltluang se, a hun takah zo thei ila, kan ram hian chak takin hmasawnna hmu se kan duh. Chumi kawnga nasa taka min puitu tur chu MPLAN dashboard hi a ni,” a ti.
Role Base Access Control nei a nih angin CM office atanga engkim a lo hmu ve thei tawh tur chu a nghakhlel hle tih chief minister hian a sawi a ni.
Chief secretary Dr Renu Sharma pawhin heng dashboard a hlawhtlin theihnana thawktute chungah lawmthu a sawi a. Scheme an thawk a, a thar a lo chhuak ve zel bawk a. An scheme thawh chu mumal lehzuala kalpui a nih dawn bakah tha zawkin monitoring an ti thei dawn a, hnathawh chak leh hlawk lehzual a hring chhuak dawn tih a sawi. Project thawktute leh sawrkar atanga viltute tan awlsamna a pek ve ve dawn bakah langtlang lehzualin Mizoram hmasawnna hnathawh a kaltir dawn tih a sawi.
Planning secretary Lalmalsawma Pachuau sawi danin, dashboard pahnih hi data thun hna thawh leh phawt tur niin, nakum January-a kalpui hman tum a ni.
-- Advertisement --
8 SDGs dashboard hi sawrkar laipuia Ministry of Personnel Public Grievances and Pension leh Mizoram Planning & Programme Implementation department sum thawh dun hmanga siam a ni a. A siam turin UNDP thawhpui an ni.
8 SDG’s lama state level atanga village level thleng vilna tur a ni a. Mizorama khua zawng zawng SDGs dinhmun a en theih anga, block level dinhmun, district level dinhmun chenin a en theih ang.
8 SDGs Local Indicator Frameworks hi state sawrkarin a duh dan anga a duan tur a ni.
8 MPLAN dashboard hi Integrity Tech Solutions Pvt Ltd nena siam a ni a. NITI Aaayog State Support Missions atanga hmuh sum hmuh nuai 69.99 hmanga siam a ni.
8 He dashboard hi project proposal, DPR thehluhna tur a nih bakah cost benefit analysis, project feasibility lo zirchian (analysis) thlengin a thawk thei a. Project ziaktute tan state level data pawimawh hriatna a pui thei bawk anga, project monitor lamah a tangkai hle ang.
8 Project details, project management, scheme surveillance, project evaluation, project resemblance matrix leh best practices thlengin a lang dawn a. Mizorama kalpui central sponsors/sector schemes leh state projects dinhmun leh hmasawn dan dah luh vek tur a ni.
8 Role Base Access Control neia duan niin heng project zawng zawng kalpui dan hi chief minister chuan a office atangin a lo hmu ve nghal zel thei dawn a ni.