Sawrkar hna thar 515 kan siam tawh: – Chief minister

An sawrkar tirh atanga kumin August thlengin sawrkar hna thar 515 an siam tawh a, hnaruak hnawh khah phalna 2619 an pe tawh tih chief minister Lalduhoma chuan a sawi. Thawhlehnia Mara Students’ Organisation (MSO) kum 60 tlin, Diamond jubilee lawm a hmanpuinaah chief minister chuan, zirlai leh thalaite tan sawrkarin hma a la nasa a, an sawrkar tirh atanga kumin August thleng khan sawrkar hna thar 515 an siam tawh a, hnaruak hnawhkhah phalna direct recruitment-ah 2087 leh Limited Departmental Exam kaltlangin 532 an pe tawh tih a sawi.
Sawrkar hnathawh tum lo tan Bana Kaih Scheme hmangin an thiamna leh theihna zawna eizawnna bul an tan theihna tur an tih a sawi a. A thawh hnihna kalpui turin an inbuatsaih mek tih a sawi a ni.
“Zirna hi hmasawn zel tura kan inchher hriamna a nih angin zirna ngaihlu ang u. Mara thalaite State Level Competitive Exam-ah in titha thin a. Zirna in ngaihlu tih a hriat. Mizoram level-a duhtawk mai loin India level-ah lang zel rawh u,” Lalduhoma hian a ti.
Zirna lama hma sawn zel theihnan kumin kum kal mekah Siaha district New Laty leh Lopu-ah cheng nuai 145 man ve ve secondary school building sak a ni a; Theiri-ah nuai 111 man higher secondary school building sak a ni. Tipa V-ah nuai 188 man hmeichhe hostel sak a ni tih a sawi a ni.
MSO chu Mara fate tana pawl tangkai, thalaite kaihruaitu, hnam huikhawmtu, Zohnahthlak unau dangte nena inpawhna tha kengkawhtu a ni tih sawiin, zirna lamah Mara thalaiten hma an sawn theihnan a thawhhlawk hle thin tih a sawi.
Tunhnaia zirchiangtu pakhatin Mizoram chu India rama eirukna tlemna ber pahnihna a ni tih an tarlan thu chief minister hian a sawi a. Corruption leh rukrukna lam reng reng dopui turin thalaite a sawm tih a sawi.
“Eiruk sum atanga lei, thil reng reng duh lo ngam ila, kan nu leh paten an eiruk atanga an lei a nih chuan eng anga thil tha pawh nise, hnawl ngam ang u,” a ti.
Mara Students Organization hi kum 1965 November 4 khan Shillong-ah din a ni.