Sawrkar hnathawkte…

Sawrkar hnathawkte hi ram leh hnamin hma a sawn theihna tura mipui sawrkarin hlawh tha tawk tak pea an rawihte an ni a. Thiamna an neih dan azirin hnathawh leh mawhphurhna hrang hrang an nei thliah a, ram leh hnamin hma a sawn theihna tura an thiamna leh theihnate hmanga sawrkar finchhuah thin tur an ni. Ram leh hnamin hma a sawn chak leh chak loh hi, sawrkar hnathawkten thahnem an ngaih leh ngaih lohah a innghat thui em em a ni.
Entir nan, agriculture department enkawltu sawrkar hnathawk officer-te hi kum tam tak chhung ram leilung leh thlai chin dan zirchhuak an ni a, an thiamna hmangin loneitu/kuthnathawktute dinhmun chawisanna tur an thawk tur a ni a, chutiang atana zirbing an nih avangin an thiamna milin sawrkar pawhin hlawh tha tak pein a ruai a ni a. An thiamna leh theihnate ram leh hnam hmasawnna tura theihtawp chhuaha an hman tangkai kha an mawhphurhna a ni a, hlawh an neih chhan pawh a ni. Kuthnathawktute dinhmun siam tha tur an ni a, an mawhphurhna an hlen chhuah that leh that loh chu an enkawl kuthnathawktute dinhmun atangin a lo lang mai thin.
Chutiang bawkin department dang dang heng —Horticulture, AH&Vety, Fisheries, P&E, Health, PWD, Education leh Tourism te pawh hi thiamna bik neite enkawlna hnuaia awm vek an ni a, ram leh mipuite tana hmasawnna an chhawpchhuah atangin hna an thawh that leh thawh that loh a lang chiang em em thin.
Ram inrelbawlna kaihhruai hna thawk tura term neia hun hmang politician-te hi chuan thiamna bik an nei tak tak lova, sawrkar hnathawk mithiamten “ram leh hnam tan heti hian ti ila” tia policy an zam ang ang kha politician-te chuan political will hmanga tihhlawhtlin kha an mawhphurhna a ni. Mahse, sawrkar hnathawkte hian an zir thiamnate hmang tangkai ngam lova a dik a dawk pawh thlu lova ‘Yes Sir’ tih vek an tum a nih chuan, ram leh mipui tan hmasawnna tak tak hi a thlengin a rinawm lo. Ram dinhmun nasa taka dawmkangtu an nih phawt chuan, an hlawh tihsan emaw, DA tihpun emaw te hi chu mipui lam hian an nawrpui hial thinin a rinawm a ni.