Sawrkar hnathawkten a hma anga hlawh lak dan kalpui leh rih duh

Sawrkar hnathawkten a hma anga
hlawh lak dan kalpui leh rih duh
Sawrkar hnathawkte chuan IFMIS system chu duhthusama hman theiha peih a nih hma chuan a hma anga hlawh lak chhunzawm turin sawrkar an ngen.
Sawrkar hnathawkte inzawmkhawmna – Federation of Mizoram Government Employees & Workers (FMGE&W) chuan Nilaini khan an inkhawmpui vawi 32-na Aizawlah an hmang a. An thurel zingah – IFMIS chu system lamah duhthusama hman theiha peihfel a nih hma chuan a hma anga hlawh lak chhunzawm ni rawh se, an ti a. New Pension Scheme tiboin, Mizoram sawrkar hnathawk zawng zawng tan Old Pension Scheme hman tura sawrkar ngen nise an ti.
Mizoram sawrkar hnuaia sawrkar hnathawkten a hun taka hlawh an lak theihna’n pawlin chak zawkin hma lak nise, an ti a. Dearness allowance chu central sawrkar hnathawkte rate ang leh an lak rualin Mizoram sawrkarin pe ve thin tura an ngen bakah sawrkar department hrang hranga post ruakte rualkhai taka hnawhkhah ngen an rel bawk.
Sawrkar hnathawk medical reimbursement bill chu tun aia awlsam zawk leh a theih anga an senso ang phuhruk zawk turin sawrkar nawr nise, an ti a. Sawrkarin Service Rules leh Recruitment Rules siam dan tur ruangam a neihah harsatna tawk an awm thin avangin guidelines hi ennawn a, siamthat ngai siamtha turin sawrkar ngen an rel.
Sawrkar sum sen tih tlem nan sawrkar hnathawk nghet, pay level 6 leh a chunglam (ACP leh non functional promotion avanga pay level 6 leh a chunglam la te huam vekin) sawrkarin ration buhfai subsidized rate-a a pek hi tihtawp vek ni rawh se, tih rawtna lut chu sawi ho a nih hnu ah, pawm nghal loin la zirchian leh nise an ti thung.
Inkhawmpui hmanpuitu chief minister Zoramthanga chuan sawrkar sum sen tih tlemna’na pay level 6 chunglam tana ration buhfai subsidise tihtawp rawtna chu fakawm a tih thu a sawi a. “Mahni hlawkna tur chauh niloa, zavai dinhmun thlir chunga inhrek zawnga ngaihtuahna a awm hi a lawmawm,” a ti.
Sawrkarna fawng vuantu thlantlinte chu inthlak fo an nih avangin ram tan hmalakna tur tha tak tak ruahman thin ni mah se, a hlawhtlinna tluantling chu sawrkar hnathawk nghette chungah thui tak a innghat tih a sawi a. Mipui hamthatna tur ruahmanna rah tha lang tur chuan kum tam tak nghah ngaite a awm thin avangin, chu rah duhawm chu a lan chhuah ngei theihna’n an pawimawh tih a sawi bawk.