Sawrkar hnathawkten zalenna an neih thin ang kha a awm ta lo – MPCC treasurer

Sawrkar hnathawkten zalenna
an neih thin ang kha a awm ta lo
– MPCC treasurer
Kalphung thar sawrkar hnuaiah sawrkar hnathawkten ram leh mipui hmasawnna tura zalenna an neih thin kha a awm ta loa, invaubehna a thleng mek tih Congress hruaitu Dr Lalmalsawma Nghaka chuan a sawi.
Nilainia Saiphai leh Saipum khua a tlawhnaah MPCC treasuer Dr Lalmalsawma chuan, sawrkar hnathawkten an ngaihdan pawh sawi ngam loin transfer & posting hmanga invaubehna a thleng mek tih thawm a ring ta hle, tia sawiin, “Congress sawrkar laia thlamuang taka sawrkar hnathawkten ram leh mipui hmasawnna tura zalenna an neih thin ang a awm ta lo hi a pawi a. Sawrkar hnathawkte pawhin ram mipui tana tha tur a nih a, Pathian mithmuh leh dan hnuaia a dik a nih ngat chuan, huaisen takin dikna leh rinawmna lama tang zel turin ka fuih duh a ni,” a ti.
Mizorama sawrkarna siam tawh zingah sawrkar kan hrawn mek chuan MNF sawrkar kal tawh khumin leiba hnutchhiah hnem ber sawrkar a nih mai a rinawm ta hle tih a sawi bawk. “Sum enkawl kawngah an kum khat sawrkar hlimthla atangin an hlawhchham chho zel dawn tih a lang ruak thei,” a ti.
Thenawm ram buai avanga Zofa unaute tawrhna thleng mekah India sawrkarin MNF sawrkar kalta leh tuna ZPM sawrkar a ngaihpawimawh loh zia a lang chiang tulh tulh tih MPCC treasuer hian a sawi a. MNF leh ZPM party ten MLA inthlana chakna atan BJP sum zêm an zen tia sawi thin chu a rinawm ta tulh tulh niin a sawi.