Sawrkar kum khatna

ZPM kaihhruai sawrkar chuan tun thla December ni 8 khan kum khat a tling a; sawrkar term khata ni 1825 awmah ni 365 an hmang ral ta. Heti hian ni 1460 (kum 4) an la nei a. Kum li chhung hian Mizoram dinhmun hi eng tiangin nge an chawikan dawn tih chu mipui thlir tur a ni leh ta.
Kum khat ralta kha chu thawklakna hun, insiamrem kum (year of consolidation) atana puan a nih avangin sawrkar thar kutthlakna hmalakna liantham beisei theih a ni lo va; chuti chung chuan, sawrkar thar a pian nia chief minister tharin press conference-a a puanzar nghal, ni za chhunga tihhlawhtlin tur erawh, ‘kan ti hlawhtling’ tiin April thla tir khan chief minister-in a sawi a. Eptu party lian ber MNF chuan, ‘an tihlawhtling lo’ an ti ve thung a.
Eng pawh ni se, tunhmaa sawrkar a inthlakthleng chang pawha la tel ve pha lo, sawrkarna fung la chelh chhin lo ‘novice player’ an nih avangin ‘a kum khatnaah lo che nawi deuh ta pawh ni se, an thiamawmna chin a awm ang chu. Chutih rual erawh chuan, sawrkar kal tate khum tum luatna lamah inchhuihbah palh a awl viau dawn niin a lang. ‘Talk less and work more’ tih hi kan sawrkar hrawn tawhte pawhin an mamawh thin a ni a, sawrkar thar pawh hian a mamawh ve dawn niin a lang.
Tun sawrkar thar hmalakna langsar tak pakhat chu ‘aikal lak titawp tura hmalakna’ hi a ni. Sawrkar kal tate pawh khan hei hi an vei em em a, tihtawp tumin hma an la lo pawh a ni bik lo; office memorandum te pawh an tichhuak fo awm e. Mahse, sawrkar tharin hma a lak ang ema urhsun chuan hma an la ngai lo. Sawrkar kaltate tih theih ngai loh hun rei lote chhunga ‘aikal lak’ titawp thei an nihnaah hian fak pawh an phu viau mai.
Committee pawimawh tak takte pawh an din thar nual a, tun dinhmunah an hmalakna rah hmuh tur la awm tam lo mah se, meeting thawm erawh hriattur a awm chho zut tawh a, meeting an neih thawm chauh ni lo hi hriatzui tur pung chho thur thur turin beisei bawk ila.
‘Tlak huama’ hnathawh tuma insawi sawrkar hian, kum li la awm mekah hian, election oriented lam hawi zawnga thil hi a kalpui chho ve a nih chuan, tlak an inhuam ang ngeiin an tlak a rinawm.