Sawrkar puihnaa badminton zir tur Thazuala

India rama infiammi naupang talent nei tha zualte’n hma an sawn lehzual theihna atana sawrkarin ruahmanna a duanchhuah zulzuiin naupang beiseiawm bikte chu sawrkar chawm leh enkalwna hnuaia hrual zui turin an thlangchhuak thin a, chuti ang naupangte chu Khelo India Athlete tiin an vuah a, tunhnaiah Mizo rawlthar H. Lalthazuala s/o H. Zohmangaiha chu heti tur hian thlanchhuah zingah telin, India sawrkar puihnain badminton a zir chhunzawm dawn a ni.
Aizawl Chanmari West rawlthar |hazuala rual hian midang pahnih Rushendra Tirupathi leh Pranauv Ram N. pawh Khelo India Athlete ni turin thlan tel an ni.
July ni 1, 2024, Thawhtannia Khelo India Talent Development department thuchhuah chuan Khelo India Athlete atana |hazuala thlan a nih thu an tarlan rualin India rama badminton zirna tha leh hmingthang Pullela Gopichand Badminton Academy-ah admit a nih thu an tarlang tel.
Khelo India Athlete tur hi Khelo India Talent Identification and Development Committee-in an thlang phawt a, chu chu High Power Committee (HPC)-in lo thlifimin, an pawmpui leh phawt a ngai thin. Athlete-te chetthat dan leh an result a zirin kum riat chhung thleng, kum khat atan cheng nuai 5 thleng sponsorship-ah hian pek an ni thin a ni.
Mizoram Badminton Association thuchhuah chuan |hazuala’n hetiang dinhmun tha leh sang a thleng thei ropui an tih thu leh an chhuan takzet thu an tarlang a, hmasawn zel tur leh Mizoram bakah India ram tihmingthatu ni zel turin duhsakna an hlan nghal.