Sawrkar sum puk hmanna zawt

Sawrkar sum puk hmanna zawt
Thla 9 chhung vela Mizoram sawrkarin sum a puk chu cheng vaibelchhe 2700 a chuang tawh tih Congress hruaitu Zodintluanga chuan sawiin, an sum hmanna a zawt.
All India Adivasi Congress Committee national executive member, minister hlui Zodintluanga hian Thorang biala khaw hrang hrang a tlawhnaah, ZPM a sawrkar atanga kumin August thleng khan vbch.2700 chuang a puk tawh chungin chhiah a tipung a, mi harsa zawkte ration buhfai a man to in a leitir a. Sum lengvak a tlem a, Krismas dawnah pawh inhralh a harsat thu sumdawngten an sawi tih sawiin, “An sum puk zozai hi enga tan nge an hman,” a ti.
Mizoramah political party engemawzatin sawrkarna an chelh tawh a, mipui leh mi harsa zawkten an tawrh lohnan inrenchem dan zawngin chhiah, tuialhthei man, ration man tlawm zawka mipuiin an khul theihnan sawrkarna chelhtuten an tawrh a ngai thin tih Congress hruaitu hian a sawi.
“ZPM sawrkar chuan a letlingin ro a rel a, chhiah a tipung a, tuialhthei man a tipung a, ration man a tipung a, VIP culture nuaibo tumtu ZPM chuan nuamsa taka sawrkarna chelhin, an duhsak zawngte restricted tender hmangin hna an pe a, nawmsaknan a puk theih theih an puk a ni,” a ti.
Thorang bialtu MLA hlui Zodintluanga hian December 11 khan Bunghmun khua kum 125 tlin lawmna a hmanpui bawk a ni.