Sawrkar thar sawisel vak hun a la ni lo – MNF MLA

ZPM chu mipuiin enchhin an duh a, sawrkar thar a la kal rei loh avangin sawisel leh puhmawh vak hun a la ni loa, an kal dan uluk takin an thlir zel dawn tih MNF MLA K Laldawngliana chuan a sawi.
Zirtawpnia MNF office – Mizo Hnam Runa inkhawmah Tuirial bialtu MLA K Laldawngliana hian ZPM sawrkar chu Pathian remruata pawm tura sawmin, Congress tel lo MNF tel lo sawrkar, tiin an inzuar a, Congress leh party dang atanga bang chuang si lo, party hrang hrangin enchhin duhin an vote pui nasa niin a sawi.
“Kan enchhin dawn a, a la rei lo em a, sawisel leh puhmawh vak hun a la ni lo. A tak taka kalphung thar a awm leh awm loh chu Assembly Session hmasa berah kan la hmu dawn chauh a. Tunhnai Assembly Session-a opposition leh ruling bial kan thliar loang, an tih kha a lawmawm a, kan thlir zel anga, kan tawngtai pui anga, an sawi anga an awm loh erawh chuan kan nawr nek dawn a ni,” a ti.
Intodelhna tura kalphung thar awmzia zawtin MLA chuan, chief minister adviser an dah teuh maite chu kalphung thar tha zawk a ni nge, an tangkaina an lo thlir dawn a, sawrkar thar chu tha taka ke pen zel turin duhsakna a hlan tih a sawi a ni.
MNF chu hnam thuthlung kengtu, martar-te thisena din, Mizo tawh phawt awmna tur a nia a hriat thu K Laldawngliana hian a sawi a. Kan ram chu tluchhe vek, politician leh sawrkar hnathawk zawng zawng corrupt em em veka tuten emaw an puh chu thil diklo tak a ni tih a sawi bawk.