Sawrkarin ni 10 ralhma in a order sut

Sawrkarin ni 10 ralhma in a order sut
Mizoram sawrkar Finance department-in engineer telna hmasawnna hna thawk lo department-ten hna an neih apianga PWD hnena pe tura hriattirna a tihchhuah chu ni 10 a ral hma, November 1 khan he order sutna order tihchhuah leh a ni.
Mizoram Finance secretary Lalthansanga chuan kumin October 22 khan hriattirna tichhuakin, engineer telna hmasawnna hna thawk ve lo, non-works department tan hetiang hna thawh ve theih phal chin awm thin thiah a nih tak thu a ni a. Hriattirna chhuahah hian non works department-ten hnathawh tur an neih eng pawh Mizoram PWD kuta pe kher loin an department-in an buaipui thei tawh anga, Mizoram Public Procurement Rules 2020 rule 92 tlawhchhanin an duh phawt chuan hna hi an department-in an thawk thei ang tih a ni. Hetiang ti tur hian Finance department remtihna lak a ni ang tih a ni bawk.
He hriattirna hi engineer ho awmna department-in an helh hle a. November 1 khan Mizoram Engineering Service Association chuan an general conference rorelah non-works department tana engineering works thawk ve thei tura a tih chu tha lo a ti a. He hriattirna hi ennawn tha leh a, hnukkir turin sawrkarah ngen nise an ti a ni. Hemi ni vek, November 1 khan Finance secretary hian a hriattirna tihchhuah tawh sutna tur hriattirna tichhuakin, non works department-ten state PWD kuta pe kher loa an department-in an buaipui thei tawh tura tih chu thiah a ni.